傑。斯與晴: 小JM料理台。簡易健康。幼兒蘿蔔糕

傑。斯與晴

早幾日介紹完整自家制叉燒，
嗰陣曾經提過除咗可以就咁當餸食之外其實仲有其他用途，
就係會用來整幼兒版蘿蔔糕啦！

其實整幼兒版蘿蔔糕嘅材料好簡單，
做法亦唔算難，好易上手，
最重要係比一般市面買到嘅蘿蔔糕更為健康。

【幼兒版蘿蔔糕】

材料：

白蘿蔔　　　一個約斤半
蝦米乾　　　適量
珍珠冬菇　　十粒
自家制叉燒　適量（可自行選擇加與否，亦可以普通豬肉代替）
粘米粉　　　100g
鷹粟粉　　　45g

*兩種粉嘅比例約2:1，呢個都係爸爸教落嘅*

做法:

1.)　先將珍珠冬菇及蝦米乾用水浸泡至軟身，備用

2.)　將白蘿蔔洗淨，刨皮及切去頂部，備用。

3.)　將白蘿蔔分成兩份，
　　一份刨成蘿蔔絲
　　一份就切成蘿蔔條

4.)　蝦米乾泡浸後切成小粒
　　珍珠冬菇則先切成條再切成粒

5.)　可按喜好加入叉燒，或普通豬肉
　　叉燒切成小粒，備用

6.)　預備粘米粉100g　及鷹粟粉45g
　　磅好後可先將粘米粉及鷹粟粉混合，備用

7.)　預熱鑊，以炒香蝦米粒、冬菇粒及叉燒粒
　　如幼兒版不加叉燒可分開炒
　　炒香後盛起，備用

8.)　以原鑊炒香蘿蔔絲及蘿蔔條

9.)　煮至蘿蔔變淋及出水後，
　　慢慢分開幾次加入已混合嘅粘米粉及鷹粟粉
　　並一邊攪拌一邊加入粘米粉及鷹粟粉
　　

10.)　最後再將已炒香嘅香蝦米粒、冬菇粒及叉燒粒加入一同混和

11.)　完成後即可盛起及分成兩碗，待蒸煮

12.)　預先煲好滾水，待水滾後將蘿蔔糕隔水蒸煮四十五分鐘

　　 小技巧：
　　可以用牙簽／竹簽插入蘿蔔糕中試看蘿蔔糕熟透程度
　　 *熟透 - 牙簽唔會沾有粉漿
　　 *未熟 - 牙簽會沾有粉漿或粉團

13.)　蘿蔔糕出爐囉！

小JM媽都有好一段時間無整蘿蔔糕啦，
以前就會同爸爸一齊整傳統蘿蔔糕，
而家就為小JM而改咗材料整幼兒版蘿蔔糕。
雖然用料唔同，但幼兒版蘿蔔糕相對健康，
而且啱晒一家大細食，就連老人家都一樣啱食。

俾小JM食就用蒸，感覺會健康一啲；
大人食就可以用煎嘅方式，會香口一啲。

小JM一向都唔食肉，連叉燒都只係麻麻地食，
估唔到整成幼兒版蘿蔔糕之後小JM會乖乖自己食晒，
小JM媽都覺得好開心滿足。

小JM媽先喺度預祝大家狗年旺相
小朋友們聰明伶俐、身體健康
靚媽們繼續又靚又Fit
型爸們財源滾滾、長賺長有