星期日, 12月 31, 2017

清潤素湯│化痰止咳。紫花果印度椰子合掌瓜粟米湯 (1yr+)

小JM媽呢排病左，雖然唔係咩大病，而係氣管問題而攪到病，
令到個人都無晒精神特別易攰。
咁岩前排買左一磅紫花果，所以拎來保個湯俾家人同自己滋潤一下。

今次煲既湯水岩晒一家大細飲用，
雖然無落豬肉同豬肉，但味道一樣清甜，仲無油份添架。

【紫花果印度椰子合掌瓜粟米湯】
唔好以為呢合湯好普通無咩特別，
其實每樣湯料都對身體好有益處架！

粟米：　　有利尿去腫退黃、降血糖及膽固醇
紫花果：　含豐富花青素，有抗氧化、保䕶眼睛功效，
                    而且含有豐富纖維，有助促進腸道蠕動，減少便秘
合掌瓜：　具有理氣舒肝、化痰止咳既效用
紅腰豆：　具補血益氣，提高免疫力功效，同時亦有助養陰、消腫 
印度椰子：有化痰止咳，潤肺清熱，滋陰養顏之效

材料：
粟米　　　　一條
紫花果　　　四粒
合掌瓜　　　兩個
紅腰豆　　　適量
印度椰子　　一個
做法:  
1.) 先將粟米去衣、再連同合掌瓜及印度椰子洗淨  
2.) 將印度椰子切成小片      
     粟米切成段      
     合掌瓜切成小片並將核除去備用       

3.) 以清水泡浸及清洗紅腰豆和紫花果, 備用  

4.) 預備一煲已煲滾既開水, 將所有材料放入並以中火煮滾      
     水滾後轉慢火再煲一小時即成  

5.) 完成後可依個人喜好加入鹽以調味         
    湯料本身已經夠清甜, 所以就無再加蜜棗      


我同小JM就飲原味, 爸爸就喜歡加鹽作調味      
呢款係素湯, 所以適合一家大細及老少飲,       
因為無放豬肉、豬骨所以湯亦較為清甜







張貼者： 於 沒有留言:

星期三, 12月 27, 2017

台中機場。親子友善設施

台北，我相信已經有唔少香港人去過，
亦係一個去短途旅行唔錯既地方。

之但係我同小JM爸就有啲唔同，我地比較喜歡台中。
喜歡台中既人和事，更喜歡台中「慢一點」既生活節奏！

台中，我同小JM爸已經來過N次，
每次都會去探朋友，
每次都會找相熟既司機接載，
每次都會去不同既景點或地方探索。

小JM出世之後我地亦照舊每年到訪台中，
除了探朋友，就係要放鬆一下。
再者，台灣亦係一個母乳友善既城市，
所以當小JM仲係細B個陣都一樣無有怕。

最近去完台中返港，
發現台中機場剛剛翻新左「哺集乳室」，
比之前更靚，更加舒適。
所以小JM媽都忍唔住要出文讚一下。
（五月個陣去都未裝修架！）
裝修之後一開門就見到一隻好靚既木馬裝飾，
房間顏色都以粉色為主調，營造出柔和而溫馨既感覺，
係房內換片、餵奶亦十分舒適。
（小JM對木馬似乎有啲興趣咁喎，不過真係唔好意思，係唔騎得架！）

房內更提供左四款不同大小既尿片以供BB們不時之用，
而小JM已經著緊尿片褲，所以我地無用到。
除左尿片外，房內亦有提供到乳墊俾母乳媽媽，
另外仲有洗奶樽用既洗樽液，及BB用既保濕乳液添！
貼心程度真係爆燈架！

你以為就係咁簡單？
係換片墊另一邊仲有埋濕紙巾，而且仲放左係濕紙巾保濕器入面添架！

除左以上幾樣設施之外，
房內其實仲設有一座大型既水機，有熱水提供，
方便俾小B沖奶粉之用添架！
台中機場既呢個哺集乳室真係唔會比日本既輸蝕架！

除左設有哺集乳室之外，
另外係五號登機閘口附近更設有一個遊樂區。
行近後最先會見到一個岩大人小朋友玩既感測遊戲區。
接著會見到一個小型既休憩區俾小B們爬下玩下，
又或者俾大B睇下書都得。
而大啲既小B，好似小JM咁，
就一定會鍾意玩樂區多啲，
可以爬上爬落，又可以當滑梯。
牆上面以膠板及書架砌出「TAI CHUNG」字樣，
書架中亦擺放左不同既童書俾小朋友及家長隨意翻看。

如果小B們唔岩玩唔緊要，
牆上其實仲有一條好得意既「蟲蟲」玩具可以俾小B們玩架！
除左遊樂區之餘，機中亦設有上網區及手機充電區，
媽媽陪小朋友玩緊個陣，爸爸亦可以上網Hea下、偷閒一下！

其實除左以上既設施之外，
台中機場亦設有多間既免稅商店以供媽媽們作最後衝刺架！

大人同小朋友買完野、玩完仲可以食野醫下肚添。

到小朋友玩到咁上下，放晒電又食飽飽，
上機後就自然乖乖訓覺，爸媽又可以一齊抖下！



下回將會為大家介紹台中既親子餐廳及影相景點喔！
唔想錯過就可以追蹤專頁喔：傑。斯與晴










張貼者： 於 沒有留言:

星期六, 12月 23, 2017

聖誕好去處。反斗親子聖誕嘉年華＠屯門黃金海岸商場

聖誕轉眼之間就到啦🎄 
爸爸媽媽們又諗好帶小朋友去邊度玩未呢？  
未既話都唔緊要， 就等小JM一家話你知有咩好玩啦！

最近係屯門既黃金海岸商場舉辦左一個名為「反斗親子聖誕嘉年華」既活動， 
正好為爸媽提供一個岩晒一家大細共度假期既親子好去處。  

反斗親子聖誕嘉年華 
日期：2017年12月23至2018年1月1日  
時間：上午10時至晚上7時  
地點：黃金海岸商場  
費用﹕每個遊戲收費港幣$30-60不等  



 我地小JM一家都唔執輸，
今日率先同一眾朋友仔入左去黃金海岸商場玩左一轉！

嘉年華入面包括左多個刺激又好玩既遊戲，
真係令大人同小朋友都玩到唔捨得走呀！

事不宜遲，我地即刻為大家介紹一下「反斗親子聖誕嘉年華」既遊樂設施啦！

F1賽車場 [ 6 Token / 20分鐘]

一個可以俾小朋友們享受極速飛馳既賽車體驗
岩晒鍾意揸車既小朋友仔。


哥哥姐姐們都玩得好開心，可惜小JM太細，未識操控啦！



充氣撞撞球 [ 6 Token / 8分鐘]
場內設有多款充氣撞撞球既球衣俾小朋友選擇，
而且更設有安全頭盔以供使用，
家長們更可落場陪同小年紀既小朋友一齊玩添架！

小JM同哥哥姐姐們展開左一場緊張刺激既充氣撞撞球激戰！
場內既大小朋友都有份參與，大人同小朋友頓時打成一片，
場面熱鬧非常呀！
估唔到小JM第一次玩竟然一啲抗拒都無，
仲好全情投入咁同哥哥姐姐們玩，
我同爸爸都覺得有啲意外驚喜！


騎馬仔 [ 4 Token / 10分鐘]
經典遊戲之一，俾小朋友們享受策騎樂趣
唔止有馬騎，仲有斑馬添架。
細啲既小B仲可以選擇騎烏龜或者甲蟲添!




親子釣魚池 [ 4 Token / 10分鐘]

嘉年華內除左動態既活動外亦有靜態既活動，
就係提供左一個地方俾大人同小朋友一齊釣魚啦！

親子釣魚池剛好提供到一個親子互動既機會俾大家享受同小朋友一齊釣魚既時光，
另一方面亦可以透過釣魚而教導小朋友要有耐性及耐心。
簡直係一舉幾得！得左！



開心射擊場 [ 3 Token ]

一個講求眼力及準成度既遊戲，正好俾機會小朋友訓練一下眼力同手既定力！
可惜小JM未識玩，所以就由媽媽落場感受一下點玩。

場內工作人員好好人，好細心教我點樣使用枝空氣槍。
最後小JM媽我都不負所託得到50分架！
你都快啲去玩，睇下會拎到幾多分啦！



魔幻大泡泡 [ 5 Token / 10分鐘]

令人感覺彷如置身於幻彩世界之中，被無數既泡泡所包圍住。
係一個影相打卡既好地方。
小朋友更可以親身試下自己整不同既泡泡添
場內更貼心提供小朋友保護衣及護目鏡以供使用。


經典遊戲海龜波波池 [ 5 Token / 10分鐘]

外型十足一個海龜既波波池，
池內滿佈波波，小朋友可以於池內游波波浴添。
除此之外，池內亦設有一座可供攀爬既吹氣滑梯，
較為適合年紀大一啲既小朋友。

 動力小車手 [ 6 Token / 10分鐘]

動力小車手同F1賽車場大同小異，
但就比較適合年紀細啲既小車手，
因為彎位相對會比較少一啲！
小JM都有落場試車架！算幾型呀嘛？
睇完介紹覺得唔夠喉?
唔緊要，即刻去片睇下有咩玩啦



 而家仲有優惠添架:
滿$130 (13代幣送1個)
滿$200 (20代幣送3個)
滿$300 (30代幣送5個)
滿$500 (50代幣送10個)

你都快啲帶埋小朋友、約埋成班人一齊來玩啦！
嘉年華去到2018年既1月1 號架咋！





張貼者： 於 沒有留言:
標籤： ,
訂閱： 文章 (Atom)