C。J の 懷孕大小事 II。首次政府產檢 兼 度頸皮 @ Week 12

早係 7月23號去陳醫生度拎左醫生證明信，

準備去登記政府醫院之制，

係東區做護士既朋友仔通知原來東區婦產科人手比例已經暗地下跌左，

人手數目仲少過標準數添 

聽到呢度，個心突然打左個突，個腦又飄出一個問題：咁，去邊度檢查同生啊B好呢？

因為呢件事，我都問過陳醫生，原來陳醫生話佢都有聽講過 

所以陳醫生提議我地不如去 "鄧志昂" ／ "贊育" 做產檢

問完陳醫生同護士朋友意見，

佢地都叫我同臭豬爸揀 鄧志昂／贊育醫院做產檢，而生就可以去瑪麗醫院生

臭豬爸 為左我可以唔駛去 贊育 咁遠，

所以就一返工就幫我打去book，希望鄧志昂可以收我呢個 "新症"

但好可惜，臭豬爸打左兩日先有人SO下佢，

話佢知原來 鄧志昂 唔收新症，

叫臭豬爸打去 贊育 試下喎

臭豬爸幾經辛苦終於都打到電話啦，

不過 贊育 無覆實佢，而係叫佢留聯絡資料，

臭豬爸就將得既聯絡資料留左俾 贊育既醫護人員啦

過左第N個星期，8月都來到啦，

我同臭豬爸出門返工個陣就同豬爸講起：咦，過左兩個星期啦，但贊育無理過我，係咪即係唔收呢？

臭豬爸聽到我咁講都只好安慰我，叫我等多幾日再算

就係我地分開返工個陣，

神奇既事就發生啦： 贊育打來comfirm收我呢個 "新症"

不過 贊育既姑娘都問左我點解唔去返東區，

話東區近我一啲，

而我亦好不客氣咁講左個事實佢知。。。"東區都唔夠人"  

姑娘似乎明白，不過都好nice咁提多我一次，

怕我到時生要去到瑪麗咁 L 遠～

當然我亦膽粗粗咁話：唔怕啦，到時都係係屋企架啦～

所以姑娘唯有幫我擇個好日子等我上贊育做第一次檢查

但，一約之下，個期原來去到 8月25號 

都無計啦，政府野係咁上下啦。。。只好欣然接受

姑娘好好人，會提醒你第一次去產檢要帶啲咩，

所需物品給下： 

1.）準媽咪身分證

2.）準爸B身分證（或copy）

3.）住址證明

4.）醫生開既懷孕證明

25/8

檢查當日臭豬爸特登請假陪我去，

前一晚仲提我帶齊野添！

姑娘叫我 9 點去到登記，

我就 8點9 未夠就到左，但登記完派既個張籌係 ：9點45分

當堂灰左 

明明早到左，但張籌。。。唉

因為我唔知道要唔要抽空肚血，

所以我唔敢食早餐住，

臭豬爸就買定左個蛋糕仔俾我，

等我餓都有野食。。。

由拎完籌 （即登記完）等到 10點，

終於都聽到姑娘話媽媽係可以食野，唔駛抽空肚血，我決定即刻食左個蛋糕仔。。。

接住落來既時間都依然係等。。。

終於，到左 10點9左右聽到姑娘叫我名啦，係啦，係叫我名啦

原來係入房問一啲簡單問題，

問完再叫係去等抽血，

約莫等左20分鐘左右就到我抽血啦

個姑娘係上左年紀既姨姨，

佢可能feel到我好緊張，就同我傾住計來安慰我，

係呀，我都有同佢講我好怕打針。。。

姑娘就好好咁同我講： 嗱，你一陣抽血就唔好望我，你望另一邊，之後呢，你就再諗下一陣間超聲波見到BB就會唔怕架啦！

姑娘都無呃得，好快手咁抽左我5 筒血，之後仲同我講： 無事啦，抽完架啦，一陣等住見BB啦

姑娘真係好nice。。。

見佢同前一個抽個陣咁cool，仲以為佢好惡，對我佢又肯同我講野，真係好好呀

P.S. 姑娘話我抽 5筒血其中一筒係要來check唐氏架，佢有解釋俾我知

好啦，血又抽完啦，咁又要做咩呢？

原來又要等叫名拎野上去 3樓照超聲波。。。

好野，終於都到戲肉啦！！

臭豬B，我地來睇你啦～

不得不說，

上到 3樓交低資料後等叫名入房照係等左成個幾鐘。。。

3 樓啲冷氣凍到不得了，連臭豬爸都覺得凍

除左凍之外，我地仲開始覺得好餓添啦，

因為都已經 12點半啦～ 完全體會到咩叫 "飢寒交迫" 

所以，去 贊育第一次產檢既準媽媽們記得要帶定少少野食，水，同外套呀

幾經等待。。。終於聽到有姑娘召喚我啦

召喚我地去照超聲波啦

一入超聲波房姑姑會提準媽咪同爸爸要熄電話，以免干擾儀器呀嘛

當一切ready既時候，

照左兩野無啦啦個姑娘話： 嗯。。。唔係好得

我當堂 "下？"左出來

姑娘跟手話： BB咁既姿勢我睇唔到條頸仔，好難幫佢度

我個心即定返，心諗： 哦～原來係想度頸皮

（P.S： 係，係我未入去前我係唔知第一次產檢就有得度埋頸皮～ 失禮失禮）

係呢個時候，我仲未識驚，完全意會唔到原來姑娘接住落來會有 "大動作"

因為啊B唔肯同姑娘合作，

所以姑娘就好大力咁碌左我個肚幾下，

我同臭豬爸係screen度見到啊B係成個好似人浪咁拋起左 

唔係一次，係兩三次。。。

因為碌完第一二次啊B都係想轉返原本個pose，

所以姑娘碌多佢兩野

就係呢個時候，

我心入面就同啊B講： 臭豬B，你乖乖地同姑娘合作啦，唔係有排碌你呀，你又唔舒服媽咪都唔舒服架

講完無耐隻臭豬B真係肯合作。。。

真係 Thanks God 

Check完姑娘只係話啊B比原先個預產期大幾日，

所以個預產期又會推前一啲

而唐氏既結果就要等下次見醫生先知，除非有咩事

臨走前，臭豬爸就問姑娘小超聲波會唔會俾我地，

姑娘rejcet左，話係要來keep record架喎

還好，過兩日我地都會再去陳醫生度，

到時先拎啦唯有

照完超聲波之後就到最後一個Step，

完成就可以走架啦，

就係預約第二次覆診期啦

終於點幾鐘攪掂晒，可以同臭豬爸去食野同行下啦

星期六就可以再見到臭豬B，

星期六檢查Pass既話呢，就可以同隻臭豬B一齊去日本旅行啦。。。

又緊張又開心

C。J の 懷孕大小事 III。孕初期病倒了

孕初期對大部份準媽媽來講都可能係辛苦既，

因為孕媽們會有孕吐、食慾不振作、胃部不適 、小便頻密、抽筋等症狀出現，

有時令到孕媽們都幾煩惱架

我好感恩既係我今次陀住呢隻臭豬B無出現過孕吐，

但明白孕吐都係一件好辛苦既事，

所以準爸爸要多啲體諒同安慰孕媽們呀！

雖然我既孕初期無孕吐，

但反而引起好強烈既食慾不振同反胃，

攪到成日都唔想食野，

特別係當聞到某種食物既氣味唔岩既時候，

就真係完全無晒胃口

正因為呢個原因，

係懷孕前增加左既磅數都回苦返，貼近返100磅。。。

呢件事亦令到臭豬爸好擔心，

佢怕我唔食野／食唔到野而令我同啊B都吸收唔到足夠既營養，再者亦好怕我地會病

終於，臭豬爸最擔心既事發生左。。。

係 8月17號開始，我食咩都好，好快就會肚瀉，而且仲要係水狀。。。

接連幾日，直到星期一都一樣係無好轉，

一直瀉，食咩飲咩都瀉

結果星期二臭豬爸 "命令"我要SL，係屋企抖，

而佢就幫我去打去陳醫生度 "求救" 睇下可唔可以打個尖睇個急診，

好好彩，陳醫生被臭豬爸心急如焚既語句打動到，叫臭豬爸快D帶我過去俾陳醫生睇下咩事

去到陳醫生度等左成個鐘先有時間插隊俾我睇，

到陳醫生了解完咩事之後，為左令我同臭豬爸放心啲就幫臭豬B照一照

見到隻臭豬B啦，見到啦

陳醫生話：啊B而家10週, SIZE岩，無事好健康

聽到醫生咁講我終於放鬆晒，我知道臭豬爸都鬆左一口氣。。。

陳醫生叫我要戒口，盡量呢個星期都要食 "粥水" ，係粥水，唔係粥！ 

臭豬爸就問陳醫生點解我會有咁既情況，

陳醫生就話：可能我本身既腸道已經敏感，所以對奶品類，蕃茄之類既蔬果過敏而導致不停肚瀉，不過無事既，飲一個星期粥水，可以有助保護胃壁，又可以止瀉，大人同BB都可以飲架

聽完陳醫生講無事，臭豬爸叫做放心左，

但係我自己就好擔心繼續瀉會對隻臭豬有影響，

所以只好乖乖地食粥水就粥水係啦

到左 8月22 號，以為無晒肚瀉已經好返之制，

點知一起身有D喉嚨痛，仲一日差過一日，結果星期一放工去左睇家庭醫生

(P.S 係睇家庭醫生之前得都有打去陳醫生度問駛唔駛過去睇，佢話呢D睇家庭醫生就得，只需同醫生講明有左就得，醫生就會識開藥架啦！）

臭豬爸原先放工係約左朋友架，但為左我同啊B，佢只好放飛機

去到醫生度，歐陽醫生好細心幫我檢查，佢發現我係喉嚨發炎引致耳仔痛，同時亦有感冒

但因為我有左BB，所以歐陽醫生話唔可以開好勁既藥俾我，

所以佢叫我為左啊B忍耐下。。。

歐陽醫生話啲藥食唔晒唔好掉，留來看門口。。。

其實個個moment我有少少想喊，

突然覺得自己好無用，

個頭未好晒，呢頭又病多次。。。

另一邊又好擔心會影響到啊B，

所以攪到個人好Down，好彩臭豬係身邊陪住我

唔係我又唔知喊個沒完沒了架啦～

不過講真，

話就話藥力輕可以食，

但食左一兩次見啲藥力又真係輕到止唔到痛個陣，

我同臭豬講： 我唔食啦啲藥，反正都無用，我唔想食太多影響到啊B，我抖多啲就得架啦

臭豬見我咁堅定都只好說 Okay，仲話叫我快D好快，唔係就無得去日本 

好好彩，經過臭豬爸既一番照顧我終於都將啲可惡既惡菌打C晒啦～

只要去日本前再去陳醫生都check多次，咁我地就可以一飛衝天啦～ 

後記： 

病左既呢兩個星期真係咩都做唔到，

比平時更加攰更加無力，

真係奉勸各位孕媽們要小心照顧自己身體呀，

因為孕婦既抵抗力係比平時弱架，

所以要格外留心呀

各位孕媽，加油呀！

C。J の 懷孕大小事 I。媽媽會＋BB展

自從 7月知道Bingo左有左呢隻 臭豬B 之後，

我同臭豬都好小心安胎，

雖然無話特別食啲咩去補，

但係就會多左好多時間留係屋企食飯休息咁，

同之前比較係唔同左，

至少臭豬因為我地變左少左時間出去玩，同無玩咁夜，

仲會陪我早D休息，等我有多啲時間休息

所以真係辛苦左臭豬爸啦 

有左 臭豬B 之後，

多左留意有關懷孕同小朋友既野，

仲知道原來有好多媽媽會可以入，

入左媽媽會除左有贈品之外，間中仲會有講座既通知，

等你可以快人一步去登記添

所以我都唔執輸，一次過登記左好多媽媽會 

為左方便紀錄，我仲整左個Excel表來記底每個媽媽會既login name 同 passward，

以免自己大頭蝦得滯無左回事～

我整理左既Excel資料如下： 

雖然睇落好似好多咁，

但係慢慢登記好快就可以登記晒，

如果唔想咁麻煩既話，可以去你去開既私家診所問姑娘拎form登記，

好似係可以一次過登記晒幾間唔同既媽媽會架

到登記完晒以上既媽媽會之後，又俾我發現原來 8月荷花有大型BB展，

即時同臭豬爸講，佢都同意要入場睇下有咩掃，就算無都可以去 "見識下" 

因為咁，臭豬爸就陪左我去BB展啦

不過。。。係去BB展之前，準媽媽同爸爸們都要準備啲野架，

如果唔係去到就會手忙腳亂架啦

（P.S. 呢啲都係我上網睇到其他媽媽們寫出來分享，所以先知咋  真係多謝佢地既分享）

去BB展做足準備，要預備既野有： 

1.）Label   ： 大量，上面已印好晒準媽媽爸爸同BB既資料

2.）手拖喼： SIZE 隨你自己揀

                    （我揀左個細喼，但去到見到好多準媽媽爸爸都係拖大喼，當堂同臭豬爸變左咁樣：  ） 

3.）入場券： 預早買好就可以係人地買緊飛既時候你就可以排隊等入場

4.）Coupon Book： 一本好駛又好用既coupon book，只需HKD＄15就可以買到一本，入面有好多既free Coupon

5.）水        ： 有需要既可以預先買定

要用label既原因係因為free coupon好多時都要你填資料，

如果準備左label就可以事事都快人一步啦

咁，究竟Label係咩樣咩格式？

又等我拎我張醜怪野俾大家睇下

都真係幾多野要打落去，所以label要好大張

臭豬爸幫我預備既label係一大張有4張label既，

所以size都算係大，

但唔緊要，照印就得，因為岩岩好貼到上去張coupon度

如果有用唔晒既label仲可以留返 2月份既BB展用添喎！

8 月8號星期六當日我同臭豬爸好早起身就準備去BB展，

今日臭豬爸決定揸車去，因為佢覺得我地去完個BB展會拎住好多野～

結果又真係俾臭豬爸估中晒既。。。

9點未夠到會展開始排隊等入場，

行到12點我都已經頂唔住，決定閃人lu～

不過收獲都算唔錯

臭豬爸雖然買左兩本coupon book，但好多時都忘記左撕埋另一本

但換到咁多野已經好開心啦

成張麻將枱鋪滿晒   

張包被上面個杯係臭豬爸好醒目咁換到，

因為係派飛仔形式換，而派飛個個人又無出聲，只係舉牌話暫停換領，

而臭豬爸又好醒咁問到佢拎飛，所以先換到，係抵俾個叻佢既

係會場唔係買左好多野咋，

唔係樣樣都岩，加上臭豬B有排都未出世，所以唔想咁急買住，只係買左以下幾樣野咋

大人BB都岩用既消毒噴霧，暖奶器，同女性用紙巾

如果身體許可，我想出年2月去多次添，到時實勁多野買者～＾＾～

♫ ESDlife靚太Club 。 星級榮譽會員 ★ sleepyceci  ♬

♩ BK Milk。親子語。駐站Blogger  ★ 傑。斯與晴  ♪

♫ Mami Buy香港媽咪幫。駐站Blogger ★ 傑。斯與晴 ♬

♩ Ohpama。Oh爸媽。駐站Blogger  ★ 傑。斯與晴  ♪

♫ 媽媽經 。 駐站精選Blogger  ★ 傑。斯與晴   ♬

♩ Ubaby Magazine。駐站Blogger  ★ 傑。斯與晴  ♪

♫ MyBB.com。 駐站Blogger  ★ 傑。斯與晴   ♬

歡迎追蹤 小JM 既Fanspage 「傑。斯與晴」：

如有任何查詢/合作，歡迎聯絡我同小JM 參與產品試用或者各樣活動

媽咪既Email係： sleepyceci＠hotmail.com

小JM既Facebook Page： 傑。斯與晴（Jolie Babe。小JM の 成長印記）