今次澳門之旅主要係為小JM婆婆慶祝生，所以今次我地決定帶著小B們一齊去食好西！
出發！
我地同朋友仔早一晚過咗澳門先，所以喺澳門嘅第一餐我地就揀咗食雞湯米！
1.) 榮暉咖啡美食
地址：新馬路十月初五街54號地舖
抵食度：
****
來得呢間老字號就緊係要食「雞湯米」啦！
之前已經來過幾次，今次就帶埋朋友一齊再嘆。
而我地到達個陣都已經接近九點，所以好多位唔駛等。
因為無BB座椅嘅關係，我地揀咗坐卡位。
今次我地四大一細分別叫咗：
雞湯米、花椒羊肉湯米、天麻川芎魚頭湯飯
炸雞中翼、炸蝦餅、炸雲吞
以上三款湯米及湯飯其實味道唔錯，而且用料十足，
之但係我地就唔係好明點解啲湯底都係甜甜地。
雞湯米
雞肉鮮嫩彈滑，配有蘿蔔、黑木耳、紅棗、杞子、冬菇等令湯底更鮮味，
湯底雖然似藥膳，但帶點甜，所以小JM都喜歡食。
花椒羊肉湯米
羊肉食落有啲似牛肉，無羶味，但夠爽滑。
天麻川芎魚頭湯飯
足料嘅魚頭湯飯！
成個魚頭上，不單止唔腥仲好嫩滑添！
（係我自陀小JM以後第一次再食返魚頭！）
湯底除左天麻川芎之外仲有桂圓、紅棗等，所以亦係帶甜。
比平時飲開嘅天麻川芎魚頭湯有唔同，藥材味無咁重！
炸雞中翼、炸蝦餅、炸雲吞
呢三款炸物亦係值得一試之選。
雞中翼炸完內裏肉質依然係好彈好滑，外脆內軟嘅感覺一流。
蝦餅皮脆足料，蝦膠爽口仲有粟米嘅香甜。
而炸雲吞就有原隻嘅蝦係入面添架！
（雲吞係特登趁收爐前炸，所以特別新鮮熱辣添！）
第二日一早接埋船就大伙兒一齊去氹仔官也街掃掃掃、食食食。
係真正嘅食足全日。
2.) 咖喱全
地址：氹仔舊城區地堡街泉福新邨第三座175-343號地舖
抵食度：
***
平時朋友們都會講話要食咖喱文，點知今次朋友就帶咗我地試咖喱全，總括而言整體都算還可以。
呢一餐我地係一行九大兩小去食，叫咗多款不同嘅碟頭飯，店內仲有小童飯椅提供。
京都骨飯: 味道尚算不錯，唔會太酸，而且亦唔太多骨;彩椒亦算爽口
全哥炒飯: 味道還可以，唔會太乾身，配料適中
咖喱豬扒飯：咖喱夠辣，豬扒夠鬆軟
馬介休炒飯：馬介休香味聞落係OK嘅，但食落就無咩味道，同普通炒飯略嫌差不多。
咖喱牛腩飯：喜歡辣又喜歡食牛嘅不妨一試。小JM爸食完都話夠辣，好過癮！牛肉夠淋，但略嫌肉有啲少。
咖喱牛腩份量略少，辣度十足，越食越辣，小JM爸都覺得過癮。
星洲炒米：辣味和香味夠，唔會太乾身，不過不失。
茄汁燴飯：呢個可能係我期望過高，以為係那些年嘅熾飯。但整體都尚算唔差嘅。
3.) 波爾圖葡國餐
氹仔舊城區地堡街泉福新村第1期第4座嘉開閣地下
抵食度：***
呢一餐係幫媽媽慶祝生日嘅，所以我地揀咗食葡國菜，比較特色一啲。
店內雖然未有兒童餐椅，但有加高坐位嘅坐墊提供俾小朋友用。
檸檬白酒蜆：有酒香及檸檬香，蜆肉香甜味美。小JM都有食少少。
葡式乳豬釀飯：整體其實尚算不錯，但食落乳豬有陣「蘇」味，稍為令呢道菜扣分。
特式焗軟殼蟹：【推介】四個字！香脆鬆軟～
麵包焗葡國雞：【推介】呢個菜應該加埋白飯就更加GOOD! 外層麵包夠脆，雞肉爽嫩滑溜唔「鞋」口！加埋個醬汁真係不之得了。
燒牛肋骨：對我而言覺我有點over-cooked，稍為有點老。味道還可以。
馬介休炒椰菜：略嫌馬介休味太淡
脆炸馬介休球：【推介】外皮夠晒脆口，香氣十足。內裏餡料十足。食落都有馬介休嘅香味。
4.) 茶麻里
澳門氹仔埃武拉街169號利圖大廈
抵食度：***
食完咖哩全我地係對面馬路發現兩間台式飲品店，而其中一間係香港係未見過嘅，所以為食嘅小JM媽就緊係要買來試試啦！
我同朋友仔都各自點咗一杯飲品：
春賞玉露歐蕾及
芒芒Cheese
春賞玉露歐蕾: (Matcha Tea Latte)茶味夠，不會太甜，入口順滑
芒芒Cheese：(芒果芝士奶蓋) 略嫌奶蓋部份偏少，芝士味欠奉
聽說果茶比較出色，可惜我同朋友都唔太好。
有興趣去嘅試完再分享一下喔～
5.) 世記咖啡(氹仔外賣店)
氹仔消防局前地
抵食度：****
世記相信好多人都聽過，今次我地來到都要去試一試。
而今次我地就試咗：鹹牛肉厚蛋多士 及 奶油方塊
鹹牛肉厚蛋多士：外層面包有烘過，微脆。內裏嘅厚蛋依然滑溜，唔老，而且好香蛋味，再配埋惹味嘅鹹牛肉真係爽。
奶油方塊：小JM爸話似「糖不甩」。厚多士配花生及煉奶，味道唔太甜。
鐘意咖啡嘅不妨試下佢地嘅瓦煲咖啡添喎。
6.) 沙度娜
氹仔舊城區地堡街泉福新村第1期第6座嘉裕閣地下AA舖
抵食度：****
沙度娜係澳門有幾出名都唔駛講，諗起食木糠布甸都一定會揀佢!
媽媽其實本身唔太食甜嘢，所以我地都唔諗住買傳統蛋糕。
一諗到既然來到澳門就緊係俾媽咪試下木糠布甸蛋糕啦緊係！
就係我地食緊午餐個陣我地就偷偷去訂咗個蛋糕，
仲要係心心款，仲有埋立體嘅生日快樂牌添。
小JM婆婆食後感：
第一次食，幾好味。好香甜，但唔會太膩，好啱我地長輩食。
滑溜溜入口即溶咁，唔錯。好開心。
好食過平時啲蛋糕。
7.) 康公夜市
澳門十月初五街(康公廟到新馬路路段）
開放時間 : 2018年4月14日 至 7月8日 (逢星期六、日)
「康公夜市」於2017年4月頭重新包裝，成為全澳第一個恆常流動型夜市。
呢度地方唔算大，只係一條小小嘅長街巷弄，但就已經包含咗各式嘅小食攤檔、精品及手工品攤檔，唔單止咁，仲有撈金魚遊戲添。
各式美食
包括海鮮，傳統小食及糕點糖水等。有部份仲係現煮架添。
夜市遊戲－撈金魚，好考技術架！
精品及手工攤檔：小JM媽好想畫CUTE版人，可惜檔主不在～
可惜我地食飽飯先來，唔係嘅話又係一個掃街嘅好地方。
8.) Koufu口福美食廣場
澳門路氹城金沙城中心三樓
抵食度：**
喺呢度食個「早-午餐」算係過得去，中位價嘅食物，質素算唔錯呀。
點心就比較一般其他飯菜略貴，燒賣已經要HKD$3X啦。
但其他餐點就比較好，味道與價錢都算恰當。
小JM媽比較喜歡湯飯，飯粒不太軟，適中。
砲料足，湯不會太鹹或丸濃，小朋友都啱食～
同場加映：The Little Big Club群星大巡遊
就係我地食完飯落到地下噴水池個陣，我地遇上The Little Big Club群星大巡遊。
“The Little Big Club群星大巡遊”係一個類似廸廸尼會見到嘅小型巡遊匯演，既繽紛又熱鬧，卡通人力充滿活力架。而表演者亦隨音樂節拍沿路盡情跳舞、互動交流。
日期：
至2018年9月30日
時間：
每天下午1:30
地點：
金沙城中心－金沙廣場1樓
費用：
全免
歡迎追蹤 小JM 既Fanspage 「傑。斯與晴」：
如有任何查詢/合作，歡迎聯絡我同小JM 參與產品試用或者各樣活動
