星期六, 3月 31, 2018

帶著小B去旅行。台中。赤腳丫生態農莊　

係香港要呼吸下新鮮空氣好多時要到新界嘅田園區先可以，
對於住港、九區嘅可能就會有少少遠，
但有時為咗可以俾多啲機會小朋友接觸大自然，
家長們都在所不惜早起去農莊。

今次台中之旅我地喺行程中安排咗好多時間帶小JM去親子餐廳及生態農莊等，
實行好好咁放鬆一下，食下野玩下，親親大自然。
我地小JM家接住落來會為大家介紹嘅係 - 赤腳丫生態農莊
赤腳丫生態農莊位於台中市大雅區雅潭路，
離我地入住嘅酒店只係十數分鐘，車程非常快捷。
而且園地之大真係令人嘆為觀止。

赤腳丫嘅園主希望藉著寬廣有趣嘅農莊體驗，將小朋友從電子世界引領出來，
令小朋友增進智能、拓展視野、陶冶性情之餘，
亦可以舒展筋骨、強健體魄，更可以改善人際互動技巧添。

入場後所睇到嘅赤腳丫比隔著欄杆睇更遼闊，
而且有一大片青青草地俾小朋友奔跑玩樂，
場內不單止設備整全、多樣化，
而且仲種滿咗各式各樣嘅花卉、植物及蔬菜添！
所以赤腳丫嘅空氣亦份外清新。

赤腳丫喺一個可以俾大人同小朋友一齊共享親子時光嘅好地方，
除咗有餐廳、遊樂場、小動物之外，場內亦設有紀念品售賣處及農地。
赤腳丫絕對係一個包含咗食、玩與學習體驗於一身嘅好去處!

玩樂篇：

進場後見到一大塊草地已經相當吸引，
細看之下發現原來草地一旁設有小隧道俾小朋友玩樂之用。
唔單止咁，喺園區內仲設置咗一啲小型氹氹轉，
空間剛好夠一個小朋友坐，夠晒獨特。
而且園區內仲設有好多得意嘅坐椅俾大人及小朋友影相及休息添。

除此之外，園內亦設有沙池及嬉水池於園區後場，
但園區後場只會開放到下午5點半咋。
適逢我地來嘅時候仲係冬天，所以嬉水區亦無開放喔！


而草地盡頭就係一個遊樂場。
遊樂場有兩層，分別設有三條不同高度嘅滑梯。
頂層小房子內有巨型積木，而底層則設有小型波波池。

波波池面積雖然不大，但對三歲或以下小B們而言就足夠有餘。
進入波波池之前記得要除鞋並且著上襪仔呀！
波波池設有紗網，除止小B自行逃脫！

係遊樂場底層除咗有波波池之外其實仲設有一個智樂遊戲區，
入面放咗好多唔同種類嘅益智遊戲，實行考你智慧之餘仲考埋你嘅定力。
而遊戲區嘅旁邊仲有車仔同木馬坐添架。

動物篇：
喺赤腳丫嘅前場及後場都分別飼養咗唔同嘅小動物以供小朋友認識，
大至山羊，小至雀烏都一樣有。

前場區分別有兩個飼養點，
一個設於紀念品售賣處旁，而另一個則設於遊樂場旁邊。

紀念品售賣處旁嘅飼養點養咗好多種不同種類嘅雀烏，
而園主亦有在旁邊豎立各種鳥類嘅名稱木牌，以方便觀賞。

喺遊樂場旁邊嘅飼養點就養咗一隻巨形嘅陸龜、鴛鴦及鳥類等。
今次都係小JM頭一次咁近距離觀看巨龜咋！
小JM都睇到嘩嘩聲。


而後場區亦設有小動物嘅飼養點，
除咗分別飼養咗山羊、兔仔、家禽、青蛙及魚類，
就連蝴蝶都一樣有。

植物篇：

玩完又睇完動物嘅不妨都去後場觀賞一下園內所種植嘅蔬果。
小如士多啤梨，大如西瓜都一樣有。
就連茼蒿、大蒜、大白菜、芭樂、桃樹同蓮霧都有！

唔單止咁，園內仲設有多個生態種植場及教室添架，
不過想參觀或參加工作坊就要事先查詢一下開放時間啦！
－　水耕教室
－ 生態教室
－ 魚菜共生區
－　原生池
－ 生態池

打卡影相篇：

園內除咗有遊樂場同小動物之外，
其實仲有好多得意又可愛嘅影相位添架，
啱晒鍾意影相打卡及自拍嘅你！
小JM都忍唔住要同爸爸放閃呢！

食物篇：
玩完一輪又睇完動物就緊係要醫一醫肚啦！
係園區內設有有餐廳及Cafe可以俾我地醫肚嘅，
如果想BBQ燒下野食就可能要預早BOOK啦!

我地去嘅日子為平日，所以人流唔算多，
如果遇上假日建議可以先行訂坐，以免要等位。
餐廳有內、外用餐區可供使用。

餐廳亦設有兒童餐以供小朋友們享用，
分別為小王子咖哩飯及小公主肉醬都兩款。（餐單）

剛好我地為小JM點咗小公主肉醬面，
但唔知點解都係車車餐盤。
不過兒童餐來講亦算豐富，有主菜、雞塊、甜品同飲品。
味道亦算不錯，唔會太濃。


如果唔想食太飽亦可以考慮到遊樂場區附近嘅Cafe用餐，
食件蛋糕嘆杯咖啡亦都係一個唔錯嘅選擇！

如果唔趕時間亦可以等埋夜晚亮燈之後先走，
又會係另一種嘅格調。



Video介紹: 
https://youtu.be/xkJFLpJDKXs?list=UUSwVQiHb2UNkGdthg3tDI9A


地址 : 台中市大雅區雅潭路三段500號
電話 :(04)2569-0735
營業時間 : 10:00-21:00

*到訪前要先查詢休息日喔!*

收費：
成人
平日入園，門票150元可抵150元消費
星期例假日門票150元可抵50元消費
平日及星期例假日下午17:30後可免費入園。

 小童
未滿一足歲不收費，滿一足歲以上，身高100公分以下的孩童
平日入園，門票100元可抵100元消費，
星期例假日門票100元可抵50元消費，
平日及星期例假日17:30後可免費入園。




張貼者： 於 沒有留言:
標籤： ,

星期一, 3月 26, 2018

媽媽也愛美│束腹。美胸療程初體驗 (含優惠碼)

做咗全職媽媽已經兩個月，雖然仲未完成可以話事事順暢，
但都叫做「過得去」，而爸爸亦好體貼放工都會幫下手，
有時又會係我失意沮喪嘅時候鼓勵我添。

爸爸早幾日放假幫手湊小JM，
仲叫我有時間就出去「放風」鬆下個人添。

難得有時間，於是就去咗位於銅鑼灣嘅SPA AYURVEDA體驗咗兩個療程，
分別係「阿育吠陀腹部按摩+祖傳古法束腹紮肚」療程 及 「Fit Magic Plus 」美胸療程。

無計啦，做咗媽媽之後條腰已經不再，再加上做埋奶媽，
真係條腰同個胸都「奉獻」咗俾小JM。
所以今次要藉著體驗療程再急救一下。

SPA AYURVEDA位於銅鑼灣地段，相當容易就可以揾到，而且交通好方便添。
喺介紹兩個體驗療程之前就先簡單講一講個環境啦！
美容中心位處十三樓全層，一出升降機即可直達中心大門。
中心環境相當唔錯，周圍都好乾淨舒適，
房間內部亦都好整齊簡潔，而且唔會太嘈吵。
中心內播放旋律輕鬆嘅音樂，伴隨香薰嘅氣味及柔和燈光就更加令人放鬆。

環境：　****
潔淨度：****
舒適度：****


先來簡介一下今次我試做嘅兩個體驗療程先：

「阿育吠陀腹部按摩+祖傳古法束腹紮肚」療程 試做價HKD$388-
呢個療程就真係好適合媽媽們，小JM媽亦推薦大家試試，
特別係啱啱生完BB嘅媽媽、有腰背痛問題或有肚腩嘅都不妨一試。

祖傳古法束腹紮肚療程可以加壓產後鬆弛嘅腹部，以外敷天然草本修腹藥，再配合天然有機棉帶束身，就以將前面嘅肌肉拉埋、修復，幫助矯型復位、子宮收縮，同時亦可以改善背痛添架。而最重要莫過於可以幫助還原產前身型、促進血液循環及排毒啦!
(廣告成日都聽到：排清毒素身體好）

過程介紹：
入到房之後小JM媽我就好乖乖咁聽從治療師嘅指示先除去衣服鞋襪，
並平訓係床度準備接受治療師嘅按摩。

治療師會先洗好手再塗上按摩油再慢慢幫我按摩肚仔，話可以幫助血液循環、排水及去除肚風架。治療師真係好利害，一摸就知我平時無戒口係生冷野嘅愛好者。（真係想呃都呃唔到！）

按完肚之後治療師就會預備天然草本修腹草藥，成份分別有：肉荳蔻粉、薑黃、薑、蔬菜蜂鳥、香茅、糙米、丁香、肉桂、羅望子皮、小回香籽、八角、荳蔻、高嶺土、糯米、食用梳打粉。完全純天然，無色素亦無香料，連我咁敏感嘅皮膚使用都一樣無問題。
修腹草藥完成後，治療師會慢慢幫我搽喺肚嘅周圍，
同時亦會提醒我搽嗰陣會有少少凍冰冰嘅感覺。
搽完修腹草藥之後，治療師就幫我先用棉紙及保鮮紙包好，
之後再用紮肚帶綁實，咁就大功告成架啦！
紮好之後我已經開始覺得個肚有種暖暖地嘅感覺呢。


 治療師小提示：
修腹草藥可以紮6~8小時
但如有不適或皮膚痕癢的話就要拆除紮肚帶，並清洗修腹草藥架啦！

紮完肚之後仲有一個美胸療程要試，所以就只好繼續乖乖訓好。

 「Fit Magic Plus 」美胸療程 試做價HKD$238-
呢個療程對於作為人奶媽嘅小JM媽來講真係好有用，
畢竟餵完人奶後唔多唔少胸形始終都會有所改變，
所以小JM媽今次就決定來試一試！
聽治療師講原來Fit Magic Plus呢部機喺日本已經有好多年歷史，
而且仲可以做到好多唔同嘅效果，
可以修身、排毒、舒緩痛症、改善產後鬆弛等之外，
仲可以做到美胸嘅效果添架。
治療師接駁好晒儀器之後就即時為我按摩手臂及腋下淋巴位，
以改善血液循環及手腳冰冷問題。
為咗令我更能感受到做療程前後嘅分別，治療師決定幫我先做完一邊身再做另一邊，
等我可以感受一下兩隻手唔同嘅感覺及比較一下。真係好細心呀。

療程完咗之後可以感覺得到胸部明顯會比之前更結實啲，
特別係著完內衣之後，效果就更明顯添。


治療師專業性：****
療程效果：　　***  (3.5)
療程價格：　　****(4.5)

就單一次嘅療程而言，整體感覺尚算唔錯。
治療師除咗夠專業細心之外仲好Nice，整個過程我地都有講有笑添。
以試做價而言，價錢合理，性價比唔差！


【讀者優惠碼 VIP code: Ceci 】
為咗可以俾到更多靚媽試到療程，
小JM媽仲問SPA AYURVEDA拎咗個讀者優惠，
只要用以上優惠碼預約做療程會就有 8折優惠，
另外，如果買Package做以上兩項療程的話仲可以額外多送兩次添!
即係HKD$4,000 5次再加送2次嘅療程啦!

預約表格:  http://goo.gl/forms/1xGtu8BzlvVmSH4G3
預約Whatsapp:  https://api.whatsapp.com/send?phone=85298150520


SPA AYURVEDA
Facebook: https://www.facebook.com/AyurvedaHK/



張貼者： 於 沒有留言:

星期六, 3月 24, 2018

【復活節好去處】回味香港情@Citywalk 荃新天地

想要時光倒流回到過去？ 談何容易。
但如果想回味一下惜日香港情懷的話，相信荃新天地嘅復活節展覽就可以幫到你。
尋日我同小JM就去咗荃新天地嘅復活節展覽，
今次嘅展覽除咗有微型展覽、鐵皮玩具車展覽及舊鈔展覽 之外，
喺場內更設有多個影相打卡點添架，包括有福來邨公屋、涼茶館、上海理髮店、冰室及人力車。每個場景都係依照70~80年代嘅面貌設計而成，可以算係將經典重現。

而且展覽會場內仲有懷舊特色嘅工作坊俾大家參加添架!

事不宜遲，就等我同小JM為大家介紹一下場內嘅靚靚景點啦！

打卡影相點：
人力車
甫進場即刻被兩架顏色鮮艷嘅人力車所吸引。
人力車喺第二次世界大戰後劃時代嘅產物，但隨著時間嘅轉變漸漸被淘汰，人力車賣少見少。

福來邨公屋
福來邨，可算喺荃灣最有名嘅的公共屋邨。
係六十年代興建而成，亦喺當年荃灣發展成新市鎮嘅標誌。

場景以福來邨作背景，懷舊紙皮石地板、舊式家居、鴻運扇、木枱及圓櫈等，仿如黑白粵語殘片劇照。也許小JM長大後也未必有機會再接觸場景內嘅家俱啦。

懷舊冰室
老香港面貌又點少得冰室場景呢！格仔磚牆色調，木製桌椅，再配合牆上手寫嘅餐廳水牌，份外有風味！

鴻福堂涼茶館
涼茶館場景重現咗昔日嘅經典一面，現場仲展示咗歷史悠久嘅龜苓膏銅鼎、葫蘆涼茶缸、涼茶銅缸等，相當珍貴，值得打卡留念!
除咗來影相打卡外，於星期六日到臨的話更可以玩小遊戲換取鴻福堂涼茶及禮劵，趣味指數「爆燈」！

上海理髮店
上海理髮店可算係老香港特色店舖之一，場景內的理髮店大班椅、梳、剪髮刀等，都是由舊式理髮店所提供，款款都具歷史性，珍貴罕有。還不到舊式理髮店場景，扮演一代上海老師傅。

除咗以上幾個打卡熱點之外，場內亦有好多令人回味嘅擺設、裝飾及微型展覽架！


那些年回憶的味道。。。

首個微型荃灣大景
荃新天地特意與「TINY微影」合作，展出巨型老香港縮影街景模型，同時更首次將荃灣街景化成模型，將當年具標誌性嘅荃灣風貌呈現於眼前。

「回味荃灣」相片長廊
相片長廊採用咗復古味濃厚嘅紅磚色調設計，令人感覺彷如一條時光隧道，走過長廊就可以從中回顧荃灣各個地點嘅新舊照片對比，就好比上完一堂歷史堂！

美樂士多
場內嘅美樂士多出售賣多款懷舊汽水、零食及小玩具，有啲仲係小JM媽細個見過但而家已經好難買到添架。懷舊吹波糖、鑽石戒指糖同乖乖都是兒時必食糖果及零食。
另外，收銀櫃枱前方仲擺放咗字母擦膠添，童年回憶即時湧現！因為小JM媽細個好喜歡儲擦膠架！


 懷舊特色工作坊小介簡：
小巴牌 製作工作坊
由最後一位手寫小巴牌嘅麥師傅即場教授寫上具有荃灣特色嘅小巴牌！


中式吹糖 工作坊
中國傳統手作師傅 - 糖姨，將會即場教授中式吹糖手藝。
而當日糖姨就好細心咁教小JM製作出屬於自己又獨一無二嘅小波板糖!


糖畫 工作坊
糖畫先生將教授利用糖漿畫成唔同圖案及文字。
但因為小JM太細，唔可以自己試，於是糖畫先生分別畫咗Peppa Pig及寫咗小JM嘅名送俾小JM留念。

DIY彈珠機 工作坊
懷舊玩具專家將即場教參加者DIY彈珠機，利用木條棒及波子，製成充滿小關卡的簡易木製彈珠機，令大家體驗動手做小玩具的滋味，享受當年七、八十年代純真、簡單童趣的時光！

如果有興趣參加懷舊特色工作坊的話就需要係場內最多兩間唔同商店以電子貨幣即日消費滿HK$300即可報名架啦。名額有限，先到先得架！


回味香港情
地點: 荃新天地1期中庭
日期: 2018年3月23日 至 4月8日
時間: 上午11點 至 晚上8點




張貼者： 於 沒有留言:
標籤：
訂閱： 文章 (Atom)