顯示具有 帶著小B去旅行 標籤的文章。 顯示所有文章
顯示具有 帶著小B去旅行 標籤的文章。 顯示所有文章

星期六, 5月 26, 2018

帶著小B去旅行│慳位行裝收納法。玩樂與實用兼備。旅行滑板喼

早幾星期前小JM家同一眾親朋好友去為婆婆慶祝生日，
過咗一個愉快又難忘嘅週末澳門美食之旅！

雖然旅程只係短短幾日，但大家都玩得好開心，
有得食又有得玩，又可以放鬆一下。
令大家對七月嘅家庭旅行更加期待添呀。

講起「旅行」最頭痛莫於過要執拾行裝，
特別係帶小朋友出門，衣衫都要預多一、二兩以備不時之需。
為咗可以更慳位同節省襯衫嘅時間，我通常都會將小JM嘅衫褲同襪仔一份份收好，
即使我「忙緊」，爸爸都一樣可以快快手幫小JM輕鬆「變身」！
今之旅程我地會為小JM帶三套衫褲同兩套睡衣，仲有大毛巾添架！
想知咁多嘢可以點塞晒入一個 (30cmX20cmX12cm) 分隔袋？
一樣來睇下小JM媽嘅方法啦！

只需要幾個簡單步驟就可以好慳位咁分配好小B每日要著衫架啦!
1.)　先預先挑選或配襯好衣服，並預備一件夾衣
2.)　將夾衣左右兩側向內摺，以包裹其他衣物
3.)　將夾衣慢慢卷起，預留啪鈕位置以包裹整套衣物
4.)　最後只要將啪鈕扣好便告完成！
就係咁簡單就可以簡單快捷咁執好小JM嘅行裝啦。
見仲有位就可以擺埋泳衣添！

只要你有密實袋亦可以做到收納嘅效果。
將泳衣同游水片片一同放入密實袋，再壓走多餘空氣即刻攪掂！
你都快啲試下啦！



不過係旅程開始嘅時候都發生咗段小插曲架！
話說原本屋企有兩個細喼，我地打算用其中一個來去澳門，
點知發現有一個喼已經爆咗碌，而另一個就壞咗拉鏈。

係我地灰爆嘅時候，朋友仔借咗個喼俾我地，而個喼原來係可以當滑板玩添架！
爸爸同小JM知道咗都覺得好過癮，緊係忍唔住就試玩啦！
我返到屋企仲發玩原來呢個喼仲有好多功能添架，
攪到我都想叫爸爸買返個。

不過講到最吸引到爸爸同小JM嘅一定唔係個喼嘅功能，而係個喼會變身！
會變成一架大人同小朋友都為之而雀躍嘅 - 滑板喼！
我地三個見到都驚訝咗一陣，何解個喼咁過癮識變身？真正嘅用得又玩得。

不過講返正題先，其實個喼嘅功能都唔嘢少架！
外殼夠晒堅固，而且內層有大大小小嘅分隔位，仲有放電腦用嘅夾層添！
喼身有兩個俗稱「紅點」嘅美國海關認證密碼鎖，夠晒安全。
唔單止咁，係喼嘅上方仲有一個USB位方便將「奶媽」收藏於內添架。

你叫媽媽點樣唔心動呢？係咪？
去旅行有咗呢個「喼神」爸爸話可能唔駛帶BB車喎，哈哈！






歡迎追蹤 小JM 既Fanspage 「傑。斯與晴」：
如有任何查詢/合作，歡迎聯絡我同小JM 參與產品試用或者各樣活動
媽咪既Email係： sleepyceci＠hotmail.com
張貼者： 於 沒有留言:
標籤：

星期六, 3月 31, 2018

帶著小B去旅行。台中。赤腳丫生態農莊　

係香港要呼吸下新鮮空氣好多時要到新界嘅田園區先可以，
對於住港、九區嘅可能就會有少少遠，
但有時為咗可以俾多啲機會小朋友接觸大自然，
家長們都在所不惜早起去農莊。

今次台中之旅我地喺行程中安排咗好多時間帶小JM去親子餐廳及生態農莊等，
實行好好咁放鬆一下，食下野玩下，親親大自然。
我地小JM家接住落來會為大家介紹嘅係 - 赤腳丫生態農莊
赤腳丫生態農莊位於台中市大雅區雅潭路，
離我地入住嘅酒店只係十數分鐘，車程非常快捷。
而且園地之大真係令人嘆為觀止。

赤腳丫嘅園主希望藉著寬廣有趣嘅農莊體驗，將小朋友從電子世界引領出來，
令小朋友增進智能、拓展視野、陶冶性情之餘，
亦可以舒展筋骨、強健體魄，更可以改善人際互動技巧添。

入場後所睇到嘅赤腳丫比隔著欄杆睇更遼闊，
而且有一大片青青草地俾小朋友奔跑玩樂，
場內不單止設備整全、多樣化，
而且仲種滿咗各式各樣嘅花卉、植物及蔬菜添！
所以赤腳丫嘅空氣亦份外清新。

赤腳丫喺一個可以俾大人同小朋友一齊共享親子時光嘅好地方，
除咗有餐廳、遊樂場、小動物之外，場內亦設有紀念品售賣處及農地。
赤腳丫絕對係一個包含咗食、玩與學習體驗於一身嘅好去處!

玩樂篇：

進場後見到一大塊草地已經相當吸引，
細看之下發現原來草地一旁設有小隧道俾小朋友玩樂之用。
唔單止咁，喺園區內仲設置咗一啲小型氹氹轉，
空間剛好夠一個小朋友坐，夠晒獨特。
而且園區內仲設有好多得意嘅坐椅俾大人及小朋友影相及休息添。

除此之外，園內亦設有沙池及嬉水池於園區後場，
但園區後場只會開放到下午5點半咋。
適逢我地來嘅時候仲係冬天，所以嬉水區亦無開放喔！


而草地盡頭就係一個遊樂場。
遊樂場有兩層，分別設有三條不同高度嘅滑梯。
頂層小房子內有巨型積木，而底層則設有小型波波池。

波波池面積雖然不大，但對三歲或以下小B們而言就足夠有餘。
進入波波池之前記得要除鞋並且著上襪仔呀！
波波池設有紗網，除止小B自行逃脫！

係遊樂場底層除咗有波波池之外其實仲設有一個智樂遊戲區，
入面放咗好多唔同種類嘅益智遊戲，實行考你智慧之餘仲考埋你嘅定力。
而遊戲區嘅旁邊仲有車仔同木馬坐添架。

動物篇：
喺赤腳丫嘅前場及後場都分別飼養咗唔同嘅小動物以供小朋友認識，
大至山羊，小至雀烏都一樣有。

前場區分別有兩個飼養點，
一個設於紀念品售賣處旁，而另一個則設於遊樂場旁邊。

紀念品售賣處旁嘅飼養點養咗好多種不同種類嘅雀烏，
而園主亦有在旁邊豎立各種鳥類嘅名稱木牌，以方便觀賞。

喺遊樂場旁邊嘅飼養點就養咗一隻巨形嘅陸龜、鴛鴦及鳥類等。
今次都係小JM頭一次咁近距離觀看巨龜咋！
小JM都睇到嘩嘩聲。


而後場區亦設有小動物嘅飼養點，
除咗分別飼養咗山羊、兔仔、家禽、青蛙及魚類，
就連蝴蝶都一樣有。

植物篇：

玩完又睇完動物嘅不妨都去後場觀賞一下園內所種植嘅蔬果。
小如士多啤梨，大如西瓜都一樣有。
就連茼蒿、大蒜、大白菜、芭樂、桃樹同蓮霧都有！

唔單止咁，園內仲設有多個生態種植場及教室添架，
不過想參觀或參加工作坊就要事先查詢一下開放時間啦！
－　水耕教室
－ 生態教室
－ 魚菜共生區
－　原生池
－ 生態池

打卡影相篇：

園內除咗有遊樂場同小動物之外，
其實仲有好多得意又可愛嘅影相位添架，
啱晒鍾意影相打卡及自拍嘅你！
小JM都忍唔住要同爸爸放閃呢！

食物篇：
玩完一輪又睇完動物就緊係要醫一醫肚啦！
係園區內設有有餐廳及Cafe可以俾我地醫肚嘅，
如果想BBQ燒下野食就可能要預早BOOK啦!

我地去嘅日子為平日，所以人流唔算多，
如果遇上假日建議可以先行訂坐，以免要等位。
餐廳有內、外用餐區可供使用。

餐廳亦設有兒童餐以供小朋友們享用，
分別為小王子咖哩飯及小公主肉醬都兩款。（餐單）

剛好我地為小JM點咗小公主肉醬面，
但唔知點解都係車車餐盤。
不過兒童餐來講亦算豐富，有主菜、雞塊、甜品同飲品。
味道亦算不錯，唔會太濃。


如果唔想食太飽亦可以考慮到遊樂場區附近嘅Cafe用餐，
食件蛋糕嘆杯咖啡亦都係一個唔錯嘅選擇！

如果唔趕時間亦可以等埋夜晚亮燈之後先走，
又會係另一種嘅格調。



Video介紹: 
https://youtu.be/xkJFLpJDKXs?list=UUSwVQiHb2UNkGdthg3tDI9A


地址 : 台中市大雅區雅潭路三段500號
電話 :(04)2569-0735
營業時間 : 10:00-21:00

*到訪前要先查詢休息日喔!*

收費：
成人
平日入園，門票150元可抵150元消費
星期例假日門票150元可抵50元消費
平日及星期例假日下午17:30後可免費入園。

 小童
未滿一足歲不收費，滿一足歲以上，身高100公分以下的孩童
平日入園，門票100元可抵100元消費，
星期例假日門票100元可抵50元消費，
平日及星期例假日17:30後可免費入園。




張貼者： 於 沒有留言:
標籤： ,

星期一, 11月 27, 2017

C。Jの 帶著小B去旅行。手邊袋Check List。大阪Namba Oriental Hotel介紹

今次大阪の旅又一次見證住小JM既成長，
原來小JM都算幾叻既（某程度而言），
至少唔會係飛機上面大吵大鬧或者扭計，
都會俾返幾分薄面我地兩位，
食飽一上機就會好乖乖咁訓，
俾人嘈醒左都唔會喊或扭計。


講到搭飛機，
為左令到大家都可以得到安靜既飛行旅程，
我地都會為小JM預備定一個「手邊袋」。

「手邊袋」，其實意義係指隨手就拎到既袋，最緊要係方便。

手邊袋入面會有小JM既隨身物品、食物、玩具等。
（如果有需要可以下載「手邊袋」Check List喔！）

就今次旅程而言，小JM既手邊袋就有以下既物品：
－尿片褲
－紙巾 及 濕紙巾
－消毒潔手液

－BB零食 及 果乾
－BB飲品 或 水

－公仔、玩具
－貼紙書、繪本


或者你睇到呢度會問：點解可以帶BB零食同飲品既？

其實只要同行有一位36個月以下既小朋友同行就可以帶架啦。
不過安檢人員有權要求小朋友即場試飲飲品，
以示飲品既安全性既。

母乳媽媽。小提示： 
而因為小JM係母乳BB，
所以係我地第一次帶小JM出遊個陣就已經事先查詢左有關攜帶母乳上機既問題。
（個陣小JM係九個月大。＾＾。）

而根據機場管理局既講法而言，
如果同行有 36個月以下既小B一齊搭飛機既話，
同行既成人就可以有母乳上機，而且數量不設限。
而雖要攜帶雪藏母乳既話，
只可以帶唔超過2.5千克既乾冰上機。
但係登機同安檢既時候必須知會機場人員，以免引起不必要既誤會。

希望以上既小小資訊及分享可以幫到大家啦！＾＾


請返今次大阪之旅先，
我地入住大阪難波東方酒店（Namba Oriental Hotel）。
酒店同房間質素值得推薦，
適個帶小朋友入住。
房間夠寬敞，約2百幾平方米，
就算放左一個大喼都依然有足夠空間俾小朋間走動！

酒店地理位置算唔錯，去邊都好方便。
就算剛剛到埗要搵都唔難，
因為離遠你都會見到酒店門外既購物街上方已經掛左有酒店名既旗幟。

行近之後你會見到有一個旋轉門喔，
但要小心，別太心急而撞向玻璃喔！
入到去就會見到外型係舊式設計既升降機，
搭𨋢就會直接去到大堂Check-In架啦！

Check-In後你就會收到房卡，
之後就可以去拎房架啦！

係大堂上去住客樓層既話係需要乘搭另一部升降機既。
而住客係需要使用房卡先可以進入相關既升降機大堂架！
所以安全性都甚高。
而一入𨋢，你仲會見到酒店中央既噴水池景添！


一開門入房，小JM同爸爸都已經急不及待要衝入去。
房間都算幾大，即使開大個喼係地下都唔會怕無地方行，
夠晒地方行走，岩晒小JM。


張床夠大，三個人訓都一樣掂！
床鋪整齊，無異咪。
不過例牌媽媽都會帶定消毒噴霧噴一噴，咁就更安心。
房內除左有免費Wi-Fi提供之外，仲有一部可攜式既Wi-Fi裝置提供，
方便住客外出攜帶使用。
而房內設有空氣淨化機，岩晒我地呢個鼻敏感家庭！


睇完房又睇埋個廁所！
一樣都好企理、整潔整齊。
日用品都一樣有提供，包括牙膏牙刷、沐浴露、洗頭水咁。
而房內設有浴缸，幫小JM沖涼一樣無難度。


入住後評分：
酒店位置：＊＊＊＊
服務質素：＊＊＊＊
房間整潔：＊＊＊＊
酒店價格：＊＊＊

整體評分： ＊＊＊＊
一千蚊有找就可以住到！
最緊要係方便到帶小B入住，房間夠大。
廁所有浴缸，要幫小B沖涼都好方便。
而且地處難波，夜晚就升肚餓要醫肚都一樣咁Easy！


其他酒店介紹：
大阪酒店介紹：https://goo.gl/KkwXcR
台中酒店介紹：https://goo.gl/gnkYGC
福岡溫泉旅館介紹：https://goo.gl/By89ye
福岡酒店介紹：https://goo.gl/gYus2Y









歡迎追蹤 小JM 既Fanspage 「傑。斯與晴」：
如有任何查詢/合作，歡迎聯絡我同小JM 參與產品試用或者各樣活動
媽咪既Email係： sleepyceci＠hotmail.com
張貼者： 於 沒有留言:
標籤： , ,
訂閱： 文章 (Atom)