星期五, 12月 04, 2015

C。J の 懷孕大小事 VII。私家診所照結構

私家診所照結構 。 前傳

係10月頭做完私家產檢之後,
我有特意問過陳醫生關於照結構既野,
陳醫生當時表示佢診所係無得做照結構呢一Part,
但如果有需要既話,陳醫生都可以 refer 幾位醫生俾我,
我同豬爸聽到就緊係覺得好好,
諗住唔駛煩。。。

點知,就係10月5號既一個上晝發生左一啲小插曲,
真係嚇到我個心都離一離 

話說就係5號當日,
我就打去陳醫生refer 既醫生度問期同問價,
點知到。。。兩位醫生既期都FULL左。。。
其中一位平靚正既醫生 (謝喜兒醫生)既診所護士仲話:
"其實你個期真係好full呀,我地做唔到啦,因為好多人8週左右就book定架!"

我聽完之後個心真係沉一沉,
嚇到我即時同豬爸講,叫豬爸一齊幫手搵下~

除左陳醫生介紹個兩位醫生外,
我地一共打左去八個醫生度問仲有無期,資料如下: 
價錢為 2015年10月頭既價錢
其實仲有羅宇帆,不過無期,所以都無mark
總數打左成 10 間,最後就同豬爸商量揀邊間,
我自己就 prefer 女醫生多啲,
所以選擇上就得返兩個,仲要個期都差不多
好彩,最後都有期,揀左鄧醫生。。。

原因好簡單  : 
- 有幾個朋友去照過 (好彩佢地早一步話我知,唔係就。。。)
- 價錢合理,而且齊晒report同DVD

所以我同豬爸都一致決定係佢啦~^^~


私家診所照結構日。11月2日

幾經辛苦終於都book到個期,
亦好感激可以有個期俾我地幫臭豬B再檢查清楚一啲,
因為政府一來檢查未夠全面,二來臭豬B上次係政府照結構發現有啲問題,
所以去檢查多次,當買多個保險都好呀嘛 
無計啦,上次個姑娘講到天一半地一半咁。。。

因為今日照結構係4點,豬爸可以早D走來陪我一齊去檢查,
我都知道豬爸都係擔心我地,所以先過來陪我既 

今次醫生照得好清楚,
每一個部份都好仔細咁幫我地照,
就連眼耳口鼻咀唇都一樣慢慢照得清清楚楚~
(醫生講起耳仔,我先發現係敢府原來都係無照到架~

由於照之前我地都有同醫生講過臭豬B條腸既問題,
於是醫生都好耐心咁不停重複照多幾次

醫生總括話隻臭豬B既身體狀況同機能都好好,
而且好活躍,
至於條腸,醫生話其實好多孕媽既BB都會發生,
不過唔算係咩大問題,
佢都有問我係咪做晒唐氏,而唐氏結果又係咪正常
我地都答左醫生有做到,結果都係正常,
所以醫生叫我地唔好諗太多,只係好少事

不過豬爸就有啲擔心,
都追問醫生呢個情況最差係咩事,
醫生話得1/3 機會係同唐氏有關,但明顯我地檢查晒無事,所以唔需要太擔心

正因為醫生都咁講,
我就只好盡量叫自己唔好亂諗野,
同時亦有好多身邊朋友同我講呢個情況真係好常見,
通常BB出世就無事

就係咁,我地算係可以暫時鬆一口氣,等到11月4號再返去贊育度再照係啦
聽說 4號係見醫生,由醫生再照架 

同時,豬爸亦都提議我將鄧醫生既report俾埋陳醫生睇,睇下陳醫生有咩見解。。。
嗯,都岩既,多個專業意見都係好事來既~

希望臭豬B 乖乖地,咁爸爸媽媽就會好開心架啦~~ 

P.S. 返到屋企再睇返鄧醫生隻DVD,豬爸發現左啊B好唔斯文咁打喊露
呢一段片真係好得意
真係多得豬爸咁留心睇,係診所個陣我都無發現添~

星期三, 11月 18, 2015

C。J の 懷孕大小事 VI。政府照結構 + 第三次政府產檢

隨著兩個幾星期過去,
糖尿檢測個邊亦無接收到電話,又PASS一關  

第二次產檢個陣,醫生除左安排我做糖水檢測同覆診之外,
仲幫我約埋個期去照結構,
呢一樣我真係有啲意外,
因為之前聽朋友講,孕媽未夠35歲,又無長期病患既話好少會有機會係政府照到結構,
所以知道有得照個下都即刻同左老公講

原來而家瑪麗同贊育都將 "照結構"列入做常規檢查,
又的確唔錯咁喎。。。

但係當收到張關於照結構既Notice之後,我地都係覺得有必要要去私家做多次
因為贊育既結構係basic野,唔包照 BB既耳仔,手指,腳指咁架。。。為左安全計,都係去私家照多次好啲
(其實有無需要去私家再照都係因人而異,按自己個別需要就得啦,唔需要跟從人地架~

10月27日。晴

原先老公話唔陪我去,因為平日佢要返工,
點知佢突然又話okay,可以陪我一齊去見下啊B。。。
真係好開心~^^~

去到登記完坐左大約半個鐘多啲就到我地入去照,
因為可能係常規檢查既關係,
今次照結構唔係由醫生負責,係由姑娘做既。。。

不過姑娘全程講野都好細聲,真係唔留心多少少都聽唔清楚
姑娘都好細心逐個部分慢慢照清楚,
亦都有話我地知照緊咩,但都係個句,講得好細聲~

照到差不多完,諗住照下啊B個樣個陣,
啊B好唔合作,竟然雙手掩面唔俾人睇
真係俾佢激死
結果姑娘唯有再照左其他地方之後先再照

照完晒大部份地方,
姑娘就話啊B好好,無問題;
但係啲腸有啲光
(腸有啲光?)
姑娘當時無講啲咩,只係話: 係呀,應該無野既,有問題醫生就會打俾你架啦

之後就再照啊B個面,啊B依然係唔肯放低手,
結果呢,我又要俾姑娘搓圓㩒扁一輪,
但啊B都係唔肯合作,
結果姑娘叫我向左打側同向右打側來抖一下再照,
仲話如果再唔得要出去行下先再照

結果啊B只係肯分開少少隻手,
雙手都係掩住個頭仔,
只可以睇到個鼻,咀都睇得唔係好清,
但姑娘就講左一句: 個咀,呢個係上唇,下唇遮住睇唔到,都應該無問題無兔唇既
(我心諗: 應該?真係咁?唯有去問私家啦咁,反正好多都無照)

照完晒之後姑娘就話可以走得無問題,
等下次覆診。。。

就係咁,我同老公就帶住一絲絲既疑惑離開~

後記: 
一,兩日之後醫院打返電話來話關於結構個度醫生要見我;仲幫我約左 11月4號再照多次
(咦?仲要等多成個星期喎。。。老公就話2號去私家照個陣再問下醫生 


10月29日。第三次覆診

因為次前已經參加左 "助產使計劃" 所以今次覆診比平時快好多。。。
去到登記完唔駛半個鐘就已經見到負責我既個位助產使姑娘,
佢好細心咁同我傾左一陣,問左啲資料;
而我都同佢講左啊B腸有光既擔憂,
姑娘好好人,仲安慰左我幾句

之後姑娘就好細心咁幫我檢查,
拎部胎芯機出來聽下啊B心跳,
仲教我點分啊B同我自己既心跳~
真係好神奇呀

檢查完一切正常,
姑娘就開始幫我約下一次覆診時間同糖水檢測時間 
因為來緊下次既覆診時間會係12月,
所以我都同姑娘講定得會飛一轉台中,
佢就幫我就返個日子

我都有問姑娘我駛唔駛拎定醫生紙,
但姑娘話: 其實你個肚咁細,唔駛拎都得啦~

不過我心個句都係會照去私家拎,
以免上唔到機~

如是者,姑娘就幫我約好晒啲期,
糖水檢測呢,就去完旅行後先做,
姑娘都有解釋今次係因為到左孕中期,所以要做呢個 "常規檢測",
上次係因為家族有人有糖尿病史,所以先做多次架者

咁我都明,之但係。。。杯糖水又真係好難飲呢
仲要今次糖水測係星期一,
老公陪唔到我去添。。。
希望到時自己一個都okay啦~

星期四, 11月 05, 2015

C。J の 懷孕大小事 V。早期糖水檢測

自從第二次產檢個陣同左醫生講我屋企有人有糖尿病之後,
就俾醫生列為需要關注既孕媽。。。點解?
因為醫生擔心會有機會將糖尿病遺傳左俾啊B,
所以要我早啲飲糖水,檢測下血糖咁囉

醫院一早就幫我預約左星期六去做糖水檢測,
時間仲要係一大早添,因為要空腹來驗架,所以次前一晚過左 12點之後就唔可以再進食架啦! 

10月10日。晴
今日就係做糖水檢測既日子,
係未做檢測之前已經有啲擔心,
唔止係擔心糖水好難飲,
仲擔心自己會唔會因為糖水太甜而嘔返出來,
因為如果嘔返出來既話,就要再排過日子再做架啦。。。
真係令人緊張同擔心  

檢測時間係 8點半,
所以今日比平時返工更加早起,7點就已經起左身準備,
因為今日係星期六,老公唔駛返工,可以陪我一齊去
而老公就先先去食左個早餐,再買定個麵包俾我,等我做完檢測可以第一時間有少少野落肚
到左7點半,老爺就到左屋企樓下,準備車我地上去。。。

(要注意,係檢測期間只可以飲清水喔!直到檢測完成先可以食野架!)

未夠8點 (約7點50分左右)就已經到左,
見到門口勁多人,剛剛好坐滿晒,
我係岩岩要企個個
我老公見到呢個情境都嚇左一跳,
再接住,老公就咁講: 點解啲男人唔起身讓啲孕媽坐?成10幾個坐晒係度,後面成班孕媽喎
我話: 唔知呀,好難答你喎。。。
(你睇幾多人!我地後面仲排左好多人架。。。
企左約半個鐘,終於都開門俾媽媽們入去登記,
好好彩,原來我係 20號籌,
即係第二輪就可以抽血同飲糖水

等姑娘們SET好晒野之後就會開始叫號碼抽 "空腹血",
每次叫籌會10 個10 個咁叫,
所以我第二輪就有得抽。。。
對於我呢個咁怕打針既孕媽來講,
每次抽血或打針我其實都好驚,又好緊張,
但開心既係每次都遇到好好手勢既姑娘,好快手又唔算好痛
抽完 "空腹血" 之後,
姑娘會指示你去拎一杯 "糖水" 來飲,
要限時係 10 -20分鐘內飲完,其間係唔可以離開檢測樓層  (唔通怕你倒左/去食野?
飲完次後要自己記低時間,2個小時後再去 "抽血",睇下個血糖指數會唔會依然咁靚仔,正正常常。。。

杯 "糖水"既size 其實就係我地平時去茶餐廳叫外賣個杯凍飲既size,
拎上手發覺原來仲係暖暖地,打開個杯蓋聞到有一陣陣既檸檬味,
感覺好似我平時飲開既 "熱檸水"
我將杯糖水遞左俾老公聞,佢都話似 "檸水",
老公仲話: 你平時都飲開熱檸水架啦,應該唔怕既!快啲飲完快啲走,要加油啦!

正當佢講完,我就飲左一大啖,個一啖真係。。。好難飲,
平時飲檸水我都唔落得多糖,而呢杯糖水就好似整人節目咁落左N咁多茶匙糖,再叫你飲一樣。。。
老公見我扁晒咀就話: 你唔快啲飲凍左仲難飲喎,快啲飲,再飲返啲水就無事架啦,頂住呀!

終於,我分左 3 - 4次將杯 糖水飲晒,飲完之後我幾乎飲左1/3 枝清水,
因為真係太甜啦。。。

係等待既個兩個小時入面,我去左3次toilet,
就係第二次去toilet既時候,
我聽到隔離格既孕媽 "嘔到七彩",聽到我都有啲擔心我會跟住嘔埋一份,
我就嗱嗱聲去完 VV 諗住閃,
咁岩個位孕媽都嘔完同一時間出來洗手洗面,
我見佢嘔到雙眼通紅,見到都替佢辛苦。。。

出到去,個位孕媽仲同佢老公講佢嘔左,
之後就見佢去左登記處再約期
我都同老公講左呢件事,佢就叫我飲多啲水,唔好太擔心同諗住,就應該無事

好好彩,兩個小時過去我都無嘔到,算係大成功,
就只差最後一步 : 抽血  《--- 之後就可以離開

一夠鐘就去排隊準備抽血,抽完就可以食野架啦
姑娘話大約兩星期就會有結果,
如果touchwood有事既,一星期內就會打來。。。

就係咁,第一次既糖水檢測就完成左啦!
希望佢地唔好打來,唔好搵我就perfect 了!

接住落來就等政府照結構同覆診了!
當然唔少得私家個Part啦! 為左安心,都要照多次私家結構既!


妊娠糖尿
咩人會較容易患上妊娠糖尿?
-身體型較胖
-年齡超過三十五歲
-有糖尿病家族史
-曾患妊娠糖尿及曾生產超過四公斤的嬰孩,也較容易患上妊娠糖尿

若本身飲食習慣不良,量多油膩而又缺乏運動,會令體內血糖偏高,再加上糖尿病體質,便更容易引發妊娠糖尿病。


妊娠糖尿會有咩影響?
妊娠糖尿對媽媽同BB都會有影響,嚴的話會導致胎兒過大而令生產出現困難甚至難產,或需提早剖腹生產;亦會增加畸胎、胎死腹中、羊水過多、早產等風險。嬰孩出生時受感染和出現黃疸的機會增加,亦有呼吸窘迫症及「血糖過低」的危險,日後長大亦有較高機會患上糖尿病及心血管疾病。


所以孕媽們都要小心飲食,以少糖鹽、少芡汁、少煎炸為主,保障返自己同BB既安全呀嘛!

星期一, 10月 05, 2015

C。J の 懷孕大小事 IV。第二次政府產檢

辛苦左兩星期,終於都病好左
臨飛前兩日仲去見完陳醫生,確認左可以同臭豬B一齊飛日本!

去完個日本返來之後都無咩特別唔舒服,
所以都無改早到見陳醫生個booking,會照樣 10月3號先返去

剛剛好政府既第二次產檢係 9月17號,
所以我地好乖咁等政府既第二次產檢。

9月17日。晴

今日係第二次去贊育做產檢,
亦係第一次自己一個人去贊育,
出奇地我呢個路痴認到路 

講真,係地鐵站行上贊育的確幾辛苦,
特別佢條斜路,哈哈

今日比原定時間早左半個鐘到醫院,
好好彩又可以提早半個鐘拎籌,
即係話順利既話應該4點零就可以閃人去搵臭豬爸!

今日產檢既等候時間算係快,
一去到想話坐低就俾大堂既嬸嬸捉去度高磅重同驗小便
(P.S. 政府產檢係要自己帶小便去俾嬸嬸驗架,所以要準備樽仔呀!

完成後就要坐低等叫名見醫生/姑娘

等左大約 45分鐘左右啦,
就聽到叫名去見醫生啦,
係女醫生來既,一坐低就會問你好多既 "指定問題"
就好似: 
-有無食煙?
-有無飲酒?
-有無藥物過敏?
-有無出過水痘?
-有無屋企人有糖尿病?
之類之類既問題。。。

我因為爸爸有糖尿病既關係,
醫生都幫我做左個少少既remarks,
要我早D做糖水測試,
仲要做兩次 
(聽說一般準媽媽只係需要做一次架咋 

醫生同我傾完之後就叫左我上床度檢查,
因為上次照左隻臭豬B,
所以政府唔會咁快又幫你安排照多次。
今次醫生檢查會係 "觸診"同"聽診",
"觸診": 醫生今次主要檢查下乳房既乳腺,另外會按下肚,睇下小B位置係邊
"聽診": 其實只係拎個胎心機來搵啊B個心跳俾你聽,搵到聽到就無事架啦

檢查完又要再出去等。。。
等左唔夠一陣,有個嬸嬸過來搵我,原來係來幫我約糖水測試日子 
原先嬸嬸話約 10月3號架,但個日我地約左見陳醫生
所以嬸嬸都好好人咁幫我改左遲一個星期六  
嬸嬸幫我約完期又走左啦,
我又繼續等等等。。。

等左成個鐘,終於又叫得名啦。。。
今次入左另一間房見姑娘
原來姑娘係想介紹返:"助產士護理小組"服務
其實聽姑娘講解之前我都有了解過呢個服務,
所以都唔會太抗拒
如果姑娘就同我講我已經成功被佢踢左入會啦,哈哈
姑娘就好快手咁寫紙俾我叫我去埋約產前運動班同約下次返來照結構添!

終於係4點零鐘我地攪掂晒啲野,
可以去爸B豬公司啦! 


"助產士護理小組"服務
- 是贊育醫院及瑪麗醫院產科部合作於二零零九年四月開始在產科門診部推行的最新產科服務

服務好處: 
- 為使孕婦及其家人能容易理解和適應整個懷孕期、分娩及產褥期的心理 和生理變化,我們會安排二至三位助產士專責護理他們。加入助產士護理 小組,不但可以增進孕婦與助產士之溝通及了解,而且可以按個別孕婦之 不同需要,提供相應協助及指導。其間若發現孕婦或胎兒有任何異常的症 狀,助產士會即時轉介予當值產科醫生,以確保母嬰健康。

星期三, 9月 23, 2015

C。J の 懷孕大小事 II。首次政府產檢 兼 度頸皮 @ Week 12

早係 7月23號去陳醫生度拎左醫生證明信,
準備去登記政府醫院之制,
係東區做護士既朋友仔通知原來東區婦產科人手比例已經暗地下跌左,
人手數目仲少過標準數添 
聽到呢度,個心突然打左個突,個腦又飄出一個問題:咁,去邊度檢查同生啊B好呢?

因為呢件事,我都問過陳醫生,原來陳醫生話佢都有聽講過 
所以陳醫生提議我地不如去 "鄧志昂" / "贊育" 做產檢


問完陳醫生同護士朋友意見,
佢地都叫我同臭豬爸揀 鄧志昂/贊育醫院做產檢,而生就可以去瑪麗醫院生

臭豬爸 為左我可以唔駛去 贊育 咁遠,
所以就一返工就幫我打去book,希望鄧志昂可以收我呢個 "新症"
但好可惜,臭豬爸打左兩日先有人SO下佢,
話佢知原來 鄧志昂 唔收新症,
叫臭豬爸打去 贊育 試下喎

臭豬爸幾經辛苦終於都打到電話啦,
不過 贊育 無覆實佢,而係叫佢留聯絡資料,
臭豬爸就將得既聯絡資料留左俾 贊育既醫護人員啦

過左第N個星期,8月都來到啦,
我同臭豬爸出門返工個陣就同豬爸講起:咦,過左兩個星期啦,但贊育無理過我,係咪即係唔收呢?
臭豬爸聽到我咁講都只好安慰我,叫我等多幾日再算
就係我地分開返工個陣,
神奇既事就發生啦: 贊育打來comfirm收我呢個 "新症"
不過 贊育既姑娘都問左我點解唔去返東區,
話東區近我一啲,
而我亦好不客氣咁講左個事實佢知。。。"東區都唔夠人"  
姑娘似乎明白,不過都好nice咁提多我一次,
怕我到時生要去到瑪麗咁 L 遠~
當然我亦膽粗粗咁話:唔怕啦,到時都係係屋企架啦~

所以姑娘唯有幫我擇個好日子等我上贊育做第一次檢查
但,一約之下,個期原來去到 8月25號 
都無計啦,政府野係咁上下啦。。。只好欣然接受

姑娘好好人,會提醒你第一次去產檢要帶啲咩,
所需物品給下: 
1.)準媽咪身分證
2.)準爸B身分證(或copy)
3.)住址證明
4.)醫生開既懷孕證明

25/8
檢查當日臭豬爸特登請假陪我去,
前一晚仲提我帶齊野添!

姑娘叫我 9 點去到登記,
我就 8點9 未夠就到左,但登記完派既個張籌係 :9點45分
當堂灰左 
明明早到左,但張籌。。。唉

因為我唔知道要唔要抽空肚血,
所以我唔敢食早餐住,
臭豬爸就買定左個蛋糕仔俾我,
等我餓都有野食。。。
由拎完籌 (即登記完)等到 10點,
終於都聽到姑娘話媽媽係可以食野,唔駛抽空肚血,我決定即刻食左個蛋糕仔。。。
接住落來既時間都依然係等。。。

終於,到左 10點9左右聽到姑娘叫我名啦,係啦,係叫我名啦
原來係入房問一啲簡單問題,
問完再叫係去等抽血,
約莫等左20分鐘左右就到我抽血啦

個姑娘係上左年紀既姨姨,
佢可能feel到我好緊張,就同我傾住計來安慰我,
係呀,我都有同佢講我好怕打針。。。
姑娘就好好咁同我講: 嗱,你一陣抽血就唔好望我,你望另一邊,之後呢,你就再諗下一陣間超聲波見到BB就會唔怕架啦!
姑娘都無呃得,好快手咁抽左我5 筒血,之後仲同我講: 無事啦,抽完架啦,一陣等住見BB啦
姑娘真係好nice。。。
見佢同前一個抽個陣咁cool,仲以為佢好惡,對我佢又肯同我講野,真係好好呀

P.S. 姑娘話我抽 5筒血其中一筒係要來check唐氏架,佢有解釋俾我知

好啦,血又抽完啦,咁又要做咩呢?
原來又要等叫名拎野上去 3樓照超聲波。。。
好野,終於都到戲肉啦!!
臭豬B,我地來睇你啦~

不得不說,
上到 3樓交低資料後等叫名入房照係等左成個幾鐘。。。
3 樓啲冷氣凍到不得了,連臭豬爸都覺得凍
除左凍之外,我地仲開始覺得好餓添啦,
因為都已經 12點半啦~ 完全體會到咩叫 "飢寒交迫" 

所以,去 贊育第一次產檢既準媽媽們記得要帶定少少野食,水,同外套呀

幾經等待。。。終於聽到有姑娘召喚我啦
召喚我地去照超聲波啦
一入超聲波房姑姑會提準媽咪同爸爸要熄電話,以免干擾儀器呀嘛

當一切ready既時候,
照左兩野無啦啦個姑娘話: 嗯。。。唔係好得
我當堂 "下?"左出來
姑娘跟手話: BB咁既姿勢我睇唔到條頸仔,好難幫佢度
我個心即定返,心諗: 哦~原來係想度頸皮

(P.S: 係,係我未入去前我係唔知第一次產檢就有得度埋頸皮~ 失禮失禮)

係呢個時候,我仲未識驚,完全意會唔到原來姑娘接住落來會有 "大動作"
因為啊B唔肯同姑娘合作,
所以姑娘就好大力咁碌左我個肚幾下,
我同臭豬爸係screen度見到啊B係成個好似人浪咁拋起左 
唔係一次,係兩三次。。。
因為碌完第一二次啊B都係想轉返原本個pose,
所以姑娘碌多佢兩野
就係呢個時候,
我心入面就同啊B講: 臭豬B,你乖乖地同姑娘合作啦,唔係有排碌你呀,你又唔舒服媽咪都唔舒服架
講完無耐隻臭豬B真係肯合作。。。
真係 Thanks God 

Check完姑娘只係話啊B比原先個預產期大幾日,
所以個預產期又會推前一啲
而唐氏既結果就要等下次見醫生先知,除非有咩事
臨走前,臭豬爸就問姑娘小超聲波會唔會俾我地,
姑娘rejcet左,話係要來keep record架喎
還好,過兩日我地都會再去陳醫生度,
到時先拎啦唯有

照完超聲波之後就到最後一個Step,
完成就可以走架啦,
就係預約第二次覆診期啦

終於點幾鐘攪掂晒,可以同臭豬爸去食野同行下啦

星期六就可以再見到臭豬B,
星期六檢查Pass既話呢,就可以同隻臭豬B一齊去日本旅行啦。。。
又緊張又開心