傑。斯與晴: 小M愛玩樂。玩轉大埔。鳳園蝴蝶保育區

傑。斯與晴

早排我地小JM家去大埔參加由扶輪社舉辦嘅植樹活動。
而活動舉行嘅地點就係位於大埔市郊嘅鳳園蝴蝶保育區！

小JM媽雖然係大埔人，但係就未去過鳳園蝴蝶保育區。
去鳳園一啲都唔難，係大埔火車站搭20P小巴就可以去到附近，
落車後沿路步行就會見到凰園架啦！

凰園小簡介：
凰園係香港唯一為蝴蝶建立嘅保育區，
於1980年被劃入「具特殊科學價值地點」，
2004年更成為政府公佈12個優先加強保育地點之一，
係2005年環保協進會得到環境及自然保育基金資助，以「管理協議計劃」模式建立凰園保護區。

難得今次活動咁有意義，我地就緊係要帶埋小JM一齊去啦，
一來可以親親大自然；
二來又可以教導小JM要愛惜大自然；
三來仲可以親手植樹。

鳳園係活動前播放咗一段動畫短片俾大家睇，等大家了解一下蝴蝶會遇到嘅問題及蝴蝶嘅種類添。動畫片段既吸引又生動，小朋友們都睇得好認真。

而喺開始分組前，國際扶輪3450 地區馮興宏總監分享道:「能夠俾眾多蝴蝶棲息嘅地方就係鳳園蝴蝶保育區(鳳園)，呢度更被喻為蝴蝶天堂，係一個好值得保育地方。因此，自2017年起扶輪積極籌備植樹計劃，為香港保育盡一分力。」

原來扶輪社計劃在四月前到鳳園種植，期望種出3,000多棵灌木，以助蝴蝶棲息及繁衍下一代。所以今次能夠參與呢項活動真係極具意義架。

簡單講解完之後就開始分組，準備出發去植樹。
因為同行亦會有一班小朋友，所以會分開唔同組別，有小朋友嘅組別就會相對去近少少嘅園區。
係出發前每個家庭都會幫手拎盆栽及工具上去種植區，就連小朋友都有份出力。

到達後指導員會教家長使用工具除草，小朋友就幫忙將雜草丟棄。
過程中大家都分工合作，所以尚算順利。

除草過後就到重要環節 - 植樹。
工作人員好仔細咁按步驟教我地植樹。
先將泥土掘鬆，再將樹苗放入泥土，然後用泥蓋好根部。
最後就緊係要為樹苗淋水，等樹苗可以茁壯成長啦。

完成咗植樹活動之後，我地就跟隨工作人員一同去「賞蝶」！

唔講你可能唔知，原來香港一共有大約250個品種嘅蝴蝶架，數量係佔咗全中國嘅11%。
而當中約210個品種嘅蝴蝶喺鳳園都有架，佔咗全港80%之多，
其中約80個品種屬於本港不常見嘅添，
另外仲有大約30個品種更加係屬於罕見添架！

而講到鳳園最有名嘅明星蝴蝶就莫過於「裳鳳蝶」及「燕鳳蝶」。
當日我地小JM一家亦有幸見到「燕鳳蝶」嘅真身添！

完成導賞之後我地亦慢慢沿路折返鳳園休息。

其實係鳳園入邊仲有一個教育中心架，
入面仲放咗好多關於蝴蝶嘅資訊及演化進程添加
唔單止咁，係鳳園仲可以食到懷舊小食 - 菠蘿冰！

當日天氣都算幾熱下，所以我地都有俾小JM食菠蘿冰，
小JM表示凍冰冰好好食！

鳳園蝴蝶保育區其實只限會員先可以入去參觀架，
凰園每年都會招收會員嘅，如果唔想入會一樣無問題，
可以係丁訪當天俾HKD$20成為臨時會員都得架。

扶輪社　小簡介:
扶輪宗旨為「在世界行善」，1917年設立首個基金，名為「扶輪基金會」，成為國際扶輪內部一個獨特的組織。1929年，扶輪基金會捐出第一筆500美元善款予國際殘障兒童協會，以助有需要之孩子。而早於1905年，扶輪已逐漸發展自己的分社，由扶輪社員身體力行，為世界服務。至今扶輪的分社已遍及全球220個國家和地區，並以「We are leaders who act responsibly and take action to tackle some of the world's most pressing challenges.」為核心價值。

關於國際扶輪3450地區　小簡介:
國際扶輪3450地區是國際扶輪其中一個成員區，其範圍包括香港、澳門、蒙古國以及中華人民共和國廣東省在內，共有90個扶輪社，超過2,400名社員、76個扶輪青年服務團、81個扶輪少年服務團以及 15個扶輪社區義工團。