剛剛嘅星期日小JM家約好朋友仔們一齊去農莊玩，
除咗要親子一番之外，就緊係順道享受一下同寶貝們嘅相處時間啦。
當日天氣實在太好，曬到小JM媽我喺回程個陣不禁感到有啲頭暈頭痛添。
攤抖咗一晚見精神稍稍回復，於是即刻去買湯料嚟煲返個消暑湯水來急救一下。
【老黃瓜生薏米陳腎湯】
呢個湯雖然簡單易煲，但就具有清熱消暑之效，而且仲有助預防喉痛添架！
真係好啱天時暑熱嘅天氣飲！
老黃瓜：
具有清熱解毒、祛濕利尿、補充水分嘅功效之外，
亦因為熱量低及含丙醇二酸因而有助減肥添架。
生薏米：
生薏米比較圓身嘅，而且中間有一條啡色凹紋。
具有利水、祛濕及清熱功效。
陳腎：
即臘鴨腎，係經醃製風乾而成嘅鴨腎。
有養胃生津、消食健脾、潤肺祛燥嘅作用。
材料:
老黃瓜 一個
生薏米 半兩
陳腎 兩個
陳皮 一個
瘦肉 適量
蜜棗 一粒
做法:
1.) 先將老黃瓜清洗一下，再去除頭尾，並切半。
再以湯匙挖去瓜囊，並切成小件備用。
2.) 將蜜棗略洗盛起。
生薏米及果皮以水浸洗。
陳腎則以溫水浸洗。
瘦肉則需汆水備用。
3.) 果皮浸至軟身後可用小刀刮去囊。
4.) 煲滾水後將材料全部放入，大滾後轉小火煲一個半小時即成。
見到小JM好喜歡飲呢個湯，同會食老黃瓜，媽媽我都表示好滿意。
呢個湯用咗陳腎來煲，所以無需再加鹽。
而浸陳腎時用上溫水則可以幫助減少油份及鹽份。
歡迎追蹤 小JM 既Fanspage 「傑。斯與晴」：
如有任何查詢/合作，歡迎聯絡我同小JM 參與產品試用或者各樣活動
沒有留言:
張貼留言