星期一, 11月 20, 2017

母乳。溫馨逸事。上奶好物分享－開乳茶

早前帶著小JM一同出遊大阪，雖然小JM已出們好幾次，
但今次真係覺得呢位小妮子比從前長大多了。
媽媽真係覺得好唔捨得。
接著落來Trouble-2即將降臨，將會係爸媽與小JM既角力時段，
希望媽媽到時候唔會變成「 河東獅」整天在怒吼就好了。

小JM係母乳Baby，身邊既親朋好友都很清楚了解，亦表示很支持。
我亦好感恩能夠得到身邊各個人既支持。
由小JM出世至今我已經餵哺母乳超過20個月了，
雖然而家小JM埋身次數已經減少，
但媽媽仍然堅持著一個信念：「可以餵幾耐就幾耐，順其自然就好」

當處身大阪既頭一個晚上，小JM攤係床上「典來典去、扭來扭去」訓唔淋，
於是就問小JM要唔要奶奶，一食完奶奶無幾耐就好快訓左。
所以話，媽媽牌係最好既「安眠藥」！

出遊去到陌生地方過夜少不免會少左安全感，
還好有媽媽牌可以俾到安慰及安全感小JM。

最後旅程因為颱風而延遲左走，要住多一晚係大阪。
還好臨時臨急都仲搵到酒店，唔係既話帶住小JM就會變得好論盡架啦。
而就係當晚就發生左一則趣事，過程仲有笑有淚添。

小JM見我沖完涼又到左訓覺時間，於是。。。
小JM：媽媽，抱呀
媽媽：嗯，好啦，抱住啦。

抱左一陣小JM就入正題。

小JM：媽媽，奶奶。奶奶呀。
媽媽：你係咪飲奶奶呀？
小JM： BB飲呀。奶奶BB飲。

好啦，咁就餵媽媽奶，順便俾小JM早啲訓啦諗住。
飲左一陣諗住小JM已經飲飽，於是就問。。。。

媽媽：BB飲完我地噯噯訓啦。
小JM點頭，咁我就以為小JM飲完諗住整返好件衫就陪小JM訓。

誰知下一秒呢個小妮子喊到九彩，原來未飲完，要揀另一邊飲。。。
其實又唔駛喊既，真係傻豬既。
媽媽都俾你攪到唔知笑好定點好啦。

為左保持奶量，除左Keep住飲多啲水食多啲上奶野之外，
我仲會自己煲上奶茶來飲。
但係畢竟煲茶太花時間又唔方便，特別係出遊個陣，根本無可能煲到。
朋友因為聽到我既煩惱，而介紹左我試衍生既開乳茶。
仲買左盒俾我試，當係小小既鼓勵咁話添。
一份小小既禮物其實已經足夠令母乳媽媽覺得好窩心，多謝你呀。

雖然係朋友介紹，但循例我都會預先了解一下產品既資訊先既，
以下就係我對 衍生開乳茶 了解得出既資料及飲後感，大家可以參考一下喔。
衍生通乳菜採用草本天然成分製作而成，所以我都好放心飲用。
開乳茶主要由葛根、絲瓜乾、桔梗、大棗等草本好物製成。
有效幫助促進胸部血氣及乳腺細胞生長，同時亦有催乳及通乳作用。
而且含有豐富既鈣質、鐵質及多種維生素，係媽媽同小Baby們既每日重要所需。

開乳茶特點：
－    有助通乳上奶、增加奶量
－    益氣補血、健脾安神，有助身體復元
－    草本天然成分，無添加人造色素及防腐劑
－    方便攜帶，無需要煲藥材
飲用方法簡單方便，只需將一包衍生開乳茶加入溫水攪伴後即可飲用。
可以按個人口味而加多或減少水既份量。

小JM媽飲後感：
味道清甜，易入口，有淡淡既大棗香氣。
有別於一般以中藥煲成既通乳茶，
會比較易令人接受，入口亦不會有苦澀味道。

而且仲方便攜帶，連去旅行都一樣可以照沖可也。唔需要擔心，唔方便！
只要係親餵前兩個鐘服用就可以啦！
就係咁簡單。輕鬆。方便！



小提示： ＊衍生盒面有建議每日最多飲六次喔！＊



張貼者： 於 沒有留言:
標籤： , , , , , ,

星期四, 11月 09, 2017

C。J の 帶著小B去旅行。大阪遊。Day Pass行（上）。海遊館（含影片及介紹）

今次帶著小B遊大阪既旅程話咁快又完結左，
呢一次既旅程雖然遇上颱風，
攪到有好多地方都去唔到，
同時亦要Delay行程，比原定時間遲左一日先返到香港，
但旅程中見證著小JM既成長點滴，可謂此刻無價！

因為打風既關係，行程有所改變，
但仍然帶左小JM去海遊館、Legoland、EXPO City等，
小JM都玩到樂而忘返，見到小JM咁開心，媽媽同爸爸都好滿足呀。
一提起大阪，我諗好多人都會諗起購物、美食同美景。

無錯！
當地真係有好多大小唔同既100 YEN店、Outlet同藥妝店，
除左呢啲之外，大阪仲有好多岩晒一家大細去既景點架，
真係多到有排都玩唔晒添架！
除左購物同景點，當然唔少得既就係大阪既美食啦，
有幾個市場真係非去不可架！
緊係啦，話晒大阪都係日本第二大既港口城市呀嘛，
仲係日本東西行既交通樞紐添，所以去玩都一樣好方便架！

今次既旅程主要都係市內，車程唔算太耐，所以都無租到車，
爸爸今次可以放輕鬆一齊玩啦！
接住落來就會為大家一一介紹一啲好去處，
希望你地有機會都可以帶小B一齊去睇、去玩、去放電啦！

係出發之前有一件好重要既事要做！
就係。買。Day Pass！

Day Pass小簡介
Day Pass分兩種：「一日劵」及「兩日劵」
可以按行程需要而選購岩用既Day Pass喔！

一日劵。1 Day Pass   (2,500 YEN)
可以自由搭乘大阪市營地鐵 、新電車、
所有路線既巴士以及大阪市區既阪急、阪神、京阪、近鐵和南海電鐵。

兩日劵。2 Day Pass   (3,300 YEN）
可以連續兩日自由搭乘大阪市營地鐵 、新電車、
所有路線既巴士以及大阪市區既阪急、阪神、京阪、近鐵和南海電鐵。
小提示：
－    Day Pass係無兒童版架，三歲以下既小B們都係唔需要買飛架！
－    Day Pass唔可由南海國際機場站開始使用喔！
－    Day Pass 既使用時間會以當日首班車及尾班車作準，而唔係以時間為限
所以並非啟用後既24小時或48小時喔，要多注意喔！
－    購買Day Pass會有一個Kit set喔，內裏仲附有一本指南手冊及一套優惠喔！

超值Day Pass優惠：
－    可免費使用指定設施
－    可以免費乘搭指定路線
－    可享指定店鋪購物優惠
－    可以用優惠價享用設施
－    可享醫療服務

就今次既行程而言，我地買左「一日劵」1-Day Pass。
用左1-Day Pass原來去海遊館同Legoland都一樣會有優惠架！
海遊館優惠：      每位成人獲得100YEN 減免。

好啦，事不宜遲，出發去「海遊館」！


海遊館小簡介：
海遊館於1990年開立，座落於大阪府大阪市港區既天保山港灣村。
隔離就有一個Shopping Mall，睇完去食野買野都一樣好方便，
而Legoland都係呢個shopping mall入面，近近地又可以多一個放電既好地方！

海遊館係一個以「環太平洋火山帶」及「環太平洋生命帶」為主題既海洋展覽館。
館內設有15個以上既大水槽，而最大既足足有成5400立方公尺添！
唔單止咁，海遊館入面仲有被指為世界上最大體型既魚 － 鯨鯊！
館內除左有多個不同品種既魚類之外，仲有海豹、企鵝、水瀨、水母等既生物添！

係海遊館內設有體驗館，唔單止可以用眼去「睇」，
仲可以用手去「摸」、去零距離「接觸」魔鬼魚同鯊魚添，
只要你夠膽就可以架啦！

海遊館資料：
地址：            港區海岸通1-1-10
開放時間：    10:00～20:00 （最終入場至結束前1小時）（根據季節會有所變動）
入場收費：    16歲以上 2,300YEN＠
3歲以下免費
Day Pass每位成人門票折價100日圓
＊只限於售票窗口以現金方式購買使用＊

海豹
雖然小JM係海馬公園已經見過海豹，
但今次見到咁多又咁近距離真係第一次。
海豹們仲不停係小JM眼前游走，
小JM睇到不亦樂乎。

除左海豹仲有好跳紮紮既海豚們，
小JM見到海豚不停跳躍出水面都覺得好驚訝。
小JM見到海豚係度玩籃球，仲話海豚係打波添！
來到海游館又點少得去探下全館最巨型既「你」呢！
可惜小JM見到鯨鯊龐大身影就已經表示「驚驚」，
可是係小JM印象中既「魚魚」係應該比佢還細先岩啦。

小JM除左怕鯨鯊之外，仲怕「佢」！
上面條魚個樣又真係幾怪，媽媽都覺得條魚有啲怪。
記憶中有幾條相同既魚係躲藏係水中既機幹附近架，
真係少啲眼力都睇佢唔到呀。

館內除左魚之外仲有企鵝！
不單止館內可以睇到企鵝們，係體驗館都一樣可以。
仲係近距離觀看添呀！

體驗館內除左有企鵝仲有得觸摸魟魚同鯊魚添架！
但就要係觸摸之前做好清潔，要先清洗雙手！
另外要好好好遵從體驗館既守則架！
大、小JM一齊親親魟魚呀！（媽媽就唔係好夠膽啦。）

體驗館守則：
1.）必須洗手
2.）只能夠觸換指定部位
3.）不要觸摸魚鰭、魚尾或魚既口部
4.）觸摸時要輕輕力
5.）不要攀爬

做個守規則既乖寶寶，咁就自然玩得安全又放心啦！

一齊去片睇下海遊館有咩睇！
將影片濃縮成5分鐘，由小JM帶你走一轉海遊館啦！





下篇將會帶你去大阪 Legoland Discovery Centre，
一於繼續放電，盡情玩樂！


張貼者： 於 沒有留言:
標籤： , ,

星期一, 10月 23, 2017

賽馬會智樂好玩社區同盟@大埔持續十日玩

小JM媽最鍾意成日四圍「碌」，
為既就係想搵好玩又多FUN既地方帶小JM去玩。

小朋友除左學習之外亦需要有適當既遊玩時間，
以放鬆身心、減輕壓力，有助平衡下身心嘛。
遊玩唔等如一定要去公園，
其實社區中都隱藏著好多令人意想不到既遊戲物資，
例如單車軚、木框、木珠、布、木板等，
而呢啲物資亦往往係被人所忽略或遺棄既，
只要善用呢啲剩餘物資，係社區中都可以幻化出一個充滿趣味既樂園。

而今次小JM媽又搵到好去處啦，
就係帶小JM去參加由賽馬會智樂好玩社區同盟所舉辦既【大埔持續十日玩】！
呢個活動正正就係用左唔同物資堆砌而成，
係社區中建造出一個富趣味又具學習性既樂園，
俾小朋友同大人一齊發揮無限既創意！

難得有機會參與呢個咁特別既社區活動，
我地當然帶埋小JM去，俾多啲機會小JM接觸下唔同既事物，
再同其他小朋友一齊玩下、相處下嘛。

今次活動選址係大埔既六鄉新村公立學校舊址，
有球場、草地及舊課室，適合進行不同類型活動。

一到埗我地就要乖乖地排隊等入場，
入場後我地見到球場已經劃分為好幾個不同區域，分別有：
1.）單車軚玩樂區
       呢個單車軚玩樂區置放左多種不同大小既單車軚
       家長同小朋友都可以隨意利用車軚作玩樂功具。
       爸爸就教小JM將車軚碌來碌去，
       但似乎小JM都唔係咁識玩，所以只好追住爸爸碌出來既車軚係啦！

2.）膠桶鼓區
       呢個角落設置左幾個膠桶，而膠桶已經被膠紙封口變成一個個既「鼓」！
       小JM同爸爸隨即幻化成鼓手，一齊Battle一下咁話！
       玩玩下小JM見到有個姐姐玩，小JM都一齊去同姐姐Jam 一Jam。

3.）竹片樂園
       呢個竹片樂園真係不得了！
       用竹片搭出一個俾小朋友們可以盡情玩樂，爬高爬低既好地方，
       放電指數簡直爆晒燈，每位小朋友都顯得好開心興奮。

4.）小小工程師
       呢個角落可以提供到一個學習既小機會俾小朋友，
       家長們可以教小朋友點去「揼釘」。
       雖然小JM年紀細細，但爸爸亦照樣俾小JM戴上手套感受一下「揼釘」既感覺！

5.）運波波遊戲
       我地見證住姐姐去製作呢個運波波遊戲，
       小JM亦都好好奇，所以亦嘗試用不同物料來玩，
       睇下有咩物料先可以安全到達底層。
       似乎玩左一陣小JM終於知道「波波」先可以碌，
       其他係唔識碌架。

玩完呢度仲未夠喉？
唔緊要，呢度仲有一個大草地可以俾大人同小朋友一齊玩架！
不如我地又一齊睇下草地有咩玩啦！
1.）巨型運動波
       一塊大大既草地置放左好幾個運動波，
       岩晒小朋友用來推下、坐下、彈下咁，
       仲可以同家長們一齊玩添。
       不過小JM似乎對呢個咁大既運動波無咩興趣喎，
       唔通小JM真係怕左個運動波？XD

2.）魔術貼波波靶
       飛鏢爸爸就玩得多，玩魔術貼波波靶啦喎，
       又真係有啲考起爸爸既。
       小朋友要運用眼力、手力去作配合，務求將波波痴係靶上。

3.）棉線吹泡泡
       以棉線代替平常會用既吹泡泡機，
       除左考起爸爸媽媽們既技巧之外，亦都要有耐性架。 
       因為一個唔小心就會整唔到，要由頭來過架啦。
       所以用來訓練集中度都唔錯呀。 
           
4.）管道運球
       一個好岩大人同小朋友玩既遊戲，
       家長可以同小朋友一齊利用不同長度既管道去搭成運球道，
       將乒乓波由一邊運到去通道既另一端。
       除左要技巧，默契都唔少得架。
       砌管道呢，小JM就唔識啦。
       所以就當左係「捐山窿」玩，
       無他既，咁岩又有塊布，又真係幾岩玩捐山窿既。


玩完動態既活動之後如果來玩靜態既一樣有，
可以另一邊由舊課室改造而成既遊戲室。
入到去遊戲室會見到分左幾個小區，
有棋類區、音樂區、玩具區，
而最特別係有一個皮具製作區俾小朋友自己整小飾物架。

係遊戲室入面小JM最鍾意既當然係玩具區啦！
小JM見到有玩具Baby公仔就急不及待要拎來玩，
原來係想餵小Baby飲奶呢。
睇來小JM真係大個啦，開始學習要做一個小女生，唔再係BB啦！


呢個活動地點雖然位處於社區，
但竟然隱藏左咁多令人意想不到既好東西，
利用物資幻化成玩樂設施或工具，
除左環保之餘亦有助提升小朋友既創意思維幻化無限既可能性。






張貼者： 於 沒有留言:
訂閱： 文章 (Atom)