【聖誕限定】華麗水晶童話@ELEMENTS

朋友係要見架嘛~何況係契媽媽！

今日我同小JM就約埋契媽媽一齊去咗Elements圓方食嘢、行街兼影聖誕裝飾添！

我地就揀咗去南小館食滬菜，雖然話就話兩大一細，但我地依然叫到一枱都係。

果然我地都係有「食力」嘅一伙！

食飽飽又點少得去行下逛下影下相～

今年Elements金區原來變咗做一個法國博物館，仲展出咗多件法國皇室水晶品牌 Saint-Louis博物館嘅水晶珍品。彷彿令人置身於法國孚日森林中嘅華麗水晶童話「A Crystal Tale」一樣，而當中最吸晴嘅莫過於懸掛於半空中、逾六米高並由水晶燈組合而成嘅聖誕樹，夠晒華麗、夠晒氣派！

場內除咗有四大打卡影相點之外，仲設有「閃爍攝影區」，可以俾大家同家人或朋友們一齊影相留念添架！

VIDEO:

場內四大打卡影相位:

1.) 璀璨星光之路

粉紅拱形頂部令星光之路添上幾分暖意，啱晒一家大細或者情侶們打卡放閃。

而係星光之路上更鋪上輕觸屏幕，只要大人同小朋友從上慢慢走過，就會見到一連串嘅星光！

2.) 法式小白屋

一間外表平實嘅小白屋，有著不一樣嘅「內在美」。

係小白屋內我地可以欣賞到Saint-Louis具歷史價值嘅Tommy系列之外，

仲可以欣賞到為Elements法式聖誕展出嘅現代系列添。

九款極具特色嘅水晶珍品盡收眼內。

3.) 冬日森林

冬日森林其實係由好多不同大小、高度不一嘅聖誕樹組合而成嘅。

只要沿小路行走，就會見到兩旁有著不同聖誕裝飾嘅聖誕樹，而且仲可以欣賞到Saint-Louis博物館嘅水晶珍品添。

企係小路中史，彷如令人置身於聖誕嘅魔幻之森一樣，有著如幻似真般嘅感覺。

而係小路嘅盡頭仲有「閃爍攝影區」可以影相留念添架！

4.) 水晶燈聖誕樹

呢個打卡點可謂全場最矚目~亦係全個主題冬日森林嘅重點所在！

水晶燈聖誕樹由 Saint-Louis 以 1,500 小時人手打造，選用咗最具代表性嘅皇室經典水晶吊燈來打造。

一共用咗 24 盞水晶燈組合而成為聖誕樹，氣派非凡。

小JM媽就試過企係水晶燈聖誕樹下望上去，可謂極為壯觀。

每一盞水晶燈都係晶瑩剔透、閃閃生輝，企係樹下彷如置身萬花筒一樣令人讚嘆不矣。

水晶燈聖誕樹資料：

聖誕樹高 6 米、闊 5 米，總重量高達 1,750 公斤。

由 24 組燈飾、共 456 顆燈由天花吊下而成。

每盞水晶燈都是由匠師親自精製而成，價值逾 8,800,000 港元。

好玩影相位: 「閃爍攝影區」

係冬日森林嘅盡頭位置設有閃爍攝影區。

可以同朋友一齊係鏡頭下影相，影像仲會幻化成萬花筒般嘅GIF圖像添！

絕對係近期少見嘅攝影手法，夠特別亦別具用心

華麗水晶童話@ELEMENTS圓方

地點： ELEMENTS圓方金區

開放日期： 2018年11月16日至2019年1月1日

開放時間： 10:00am - 10:00pm