小JM料理台。簡易滋潤糖水。對抗氣管敏感。銀耳露 (1.5y+)

對全職媽媽而言，返娘家不失為一個喘息點，亦係小JM媽嘅避風港。

婆婆無論係我做女時、為人妻時或為人母時，亦一樣當我小朋看待，從無間斷。

為人母後，我深深體會當中嘅樂與苦，

真係要好好多謝媽媽一直以來嘅看顧、關懷、體諒 及照料。

媽媽，辛苦你啦!愛你!Love You!

話說尋日屋企全棟樓停電維修，所以起身煮好銀耳露之後，

好快手準備同小JM出發拎俾婆婆食。

點知就遇上港鐵三線全停，結果等巴士都等咗九個字。

還好有帶備定乾糧同飲品，可以俾小JM邊食邊等巴士。

整銀耳露唔難，亦好方便快捷，仲好啱一家大細而家轉季天氣飲用添！

雪耳：

中醫角度認為雪耳性味甘淡平，對肺、胃、腎均有裨益，有滋陰潤肺功效，

適合肺陰虛、肺氣腫及虛勞咳嗽，咳中帶血，經常感到口渴、胸悶氣短人士食用。

同時亦對氣管敏感、抵抗力下降、月經不調、大便不暢都有一定幫助。

雪耳當中嘅蛋白質含有17種氨基酸，其中7種仲係人體必須既氨基酸，

有助促進新陳代謝，好啱女仕們飲用添架！

小提示： 

雪耳有滑腸既功效，所以孕媽媽初期都係唔好食啦。

乖乖地等到預產期前先食啦。

紅棗：

紅棗含有豐富維生素、果糖及各種氨基酸。

中醫認為紅棗性暖、養血保血，可改善血液循環外，亦可養顏美容。

杞子：

杞子味甘，性平。

有淺腎、潤肺、補肝、明目既功效。

圓肉：

圓肉味甘、性溫，益心脾，補氣血。

對失眠健忘，脾虛腹瀉，產後浮腫，精神不振，等病症有效。

材料：

雪耳

紅棗

杞子

圓肉

做法：

1.) 先將雪耳用水泡浸以去除雜質及令雪耳漲大。

　 將紅棗、杞子、圓肉以水輕輕清泡或泡浸一會，備用。

2.) 雪耳浸泡好之後就可以剪成小片，以方便攪伴

3.) 雪耳剪成小片後，放入攪拌機，再加少許水一齊攪動。

　 攪至成幼少粒顆即可。

　 可按個人喜好而將雪耳打成蓉亦可。

　 

4.) 將雪耳蓉倒入鍋中，加入適量水份。
 　可按個人喜好調節稀稠度。

5.) 將紅棗、杞子、圓肉加入鍋中一同煮。

6.) 煮至自己喜歡嘅稀稠度，

　 再因應個人喜好加入冰糖即可。

因為小JM有份食，而且紅棗、杞子、圓肉已經有甜味，

所以我並未有加入太多冰糖。