星期一, 3月 12, 2018

小JM搶先試。九龍灣。九井壽司

九龍灣MegaBox最近開咗一間新嘅日式壽司店，
仲令到一班小朋友同大人為之而瘋狂，
到底呢間壽司店有咩咁吸引呢？

一於等小JM一齊帶大家睇下啦！
九井壽司位於九龍灣MegaBox 九樓，店舖設計及裝潢主要以日本新幹線列車作為藍本。
不論店內、店外亦設計得彷如新幹線一樣，
而另一特色就莫過於係以新幹線列車送餐，吸引到唔少大人同小朋友添架。

店外設有論侯位置，令客人等侯期間亦彷如置身新幹線之內，
而上方設有一個大屏幕，並設計成路線圖以顯示各款壽司及小食之價錢。
店外設有一個新式嘅輪候顯示，夠晒簡單清晰；
店內嘅裝修一絲不苟，每個角落都盡顯心思。
甚至連天花及牆身亦做得好認真及細緻添。
你又有無留意到天花有咩咁特別呢？

一踏入店內，就會見到一個小櫃枱，
上面放置咗一啲小禮物及多款不同嘅繪本及圖書。
每位到店嘅小朋友都可以隨意揀一份小禮物架，
今次服務生哥哥就為小JM送上咗一大張嘅Peppa Pig貼紙。
*中正小JM下懷，又係Peppa Pig又係貼紙*

店內提供小童用嘅BB餐椅，可按需要向店員提出要求喔。
*小JM係我影緊相嘅時候已經好悠閒咁「嘆緊茶」添啦!*

安頓好小JM之後我地就可以好安心咁點餐啦！
每張枱都設有一部平板電腦以供落單及埋單之用，
但唯一有樣唔好嘅就係部平板唔可以拎起來睇，
所以坐係平板對面嘅客人要點餐就會稍稍有啲唔太方便啦。

因為呢度大部份餐點都係即叫即整，
所以製作需時，但相信值得等待嘅！
等咗一陣，我地點嘅餐終於乘坐著新幹線列車出場啦！
係咪好有氣勢呢？

不如又一齊來睇下我地叫咗啲咩食先啦！

角切魚生丼定食 HKD$68
*角切魚生飯＋沙律＋麵豉湯*
呢個魚生飯同平時食嘅有啲唔同，
唔同在係因為有小JM媽鍾意食嘅希靈魚添架！


迷你丼駅 HKD$ 42
*三文魚蟹子丼(迷你)+牛肉薯餅+炭燒雞串*
可樂薯餅夠趣，但唔油膩


加洲駅 HKD$42
*北寄貝、三文魚、甜蝦、加洲卷(壽司)+蟹子沙律+烏冬*

兒童餐－月亮號 HKD$42
*海苔魷魚天婦羅+加洲卷+玉子燒+益力多*
圖中兩份都係月亮號，但唔同嘅係在於配搭。
正常嘅月亮號會係圖中上方嘅式樣，
但因為小JM年紀太細食唔到魷魚，
所以店員亦好貼心咁俾我地將海苔魷魚天婦羅　轉為　牛肉薯餅。
而因為俾小朋友食嘅關係，玉子燒亦都係暖架，
所以可以好放心俾小朋友進食。

除咗以上數款餐點之外，其實仲有好多款式添架！

唔單止咁，小JM媽仲發現原來由而家至三月三十一號期間仲有新張優惠添架！
記得去到第一時間拎張單張睇下，會有優惠劵添架！
可以送手卷同當十蚊駛。
而每晚六點後仲會有「HKD$20 九井海膽三色迷你丼」 添架，
不過就數量有限，先到先得囉。

可惜呀，小JM媽埋完單臨走先發現，唯有下次請早係啦。



張貼者： 於 沒有留言:

星期日, 3月 11, 2018

小M愛玩樂。玩轉東涌。昂坪360纜車體驗之旅

轉眼間又到春天，難得今日好天氣一於兩家人一齊去昂坪360玩下。
除咗要搭下纜車睇風景之餘，仲可以去昂坪市集行下添。
最近昂坪仲新開咗「360VR體驗館」，咁好玩又點可以錯過呢？
緊係約埋一家大細一齊去玩返日放鬆下啦！

昂坪小簡介：
昂坪纜車連接大嶼山東涌市中心及昂坪，全長5.7公里，全程約25分鐘。
備有三款車廂以供選擇：標準車廂、水晶車廂及私人包廂。
而當中鄰近昂坪纜車站及天壇大佛嘅昂坪市集亦係推薦景點之一，佔地1.5公頃，展現出昂坪地區嘅風俗和文化。

唔好講咁多，一於等小JM家帶大家暢遊昂坪啦！
喺去拎纜車卷之前就緊係要係影相點度影張相打下卡啦。
影完相我地就要快快手去排隊拎飛啦。

溫馨提示:
而家上網訂飛仲可以用優惠價錢去買到纜車飛及門劵添架。
分別有「1+1 標準及水晶車廂來回纜車限時85折優惠」及「360娛樂套票」兩種!

拎完飛就緊係即刻出發遊纜車河啦！
因為我地係坐水晶纜車，所以排隊嘅位置都有少少唔同，記得留意啦。

水晶纜車小簡介：
-　每架水晶纜車可以乘載到10名乘客
-　水晶車廂底部採用咗一塊三層強化玻璃而造成
-　水晶車身用咗變色設計，以配合水晶車玻璃物料所發出嘅銀光
喺纜車上，呢兩位小朋友完成無驚過，仲好鍾意坐喺車廂地下飽覽地上嘅各種景色，
特別係對地上行走中嘅各類汽車啦！


纜車到站後會見到一個關於「360VR體驗館」嘅推廣資訊。
360VR體驗館將會由2月9日至3月24日期間開放，館內設有多個虛擬實境及多媒體感官體驗添。*優惠期內仲係免費架，想玩就要記得去昂坪市集嘅360旅遊資訊中心換入場劵啦！*

優惠期內，可免費試玩以下 4 種體驗：
與胡巴捉迷藏、高空索道行、光影許願樹及百變魔衣櫥
*可以同《捉妖記2》嘅胡巴及一眾角色進行大冒險添架*

去完360VR體驗館記得去埋旁邊嘅與佛同行體驗館呀！

落車之後行無幾遠就會見到有紀念品售賣處，
我地都買咗張靚靚相做留念添。
紀念品售賣處嘅天花都有小小纜車裝飾架，好得意呀。

小提示：
唔需要擔心一張相唔夠分配，因為係會有埋相底俾返你架。
只要有呢一張「360相●分享」嘅卡，
就可以登入背面嘅網站或下載相關手機程式使用，
只需輸入相片代碼或QR CODE就可以下載及分享架啦!


步出紀念品售賣處之後就會見到「昂坪市集」，
適逢新年，昂坪市集嘅擺設亦充滿著新年嘅氣息添。

喺昂坪市集呢度有各式嘅店舖，「食、玩、買」都一應俱全。
今日天氣出奇地好，好彩昂坪市集內係有雪糕店，可以俾我同小JM消一消暑。
唔單止咁，呢度仲有長輩們最愛嘅老字號和記隆添！
呢度仲有好多唔同嘅餐廳，就連鐵板燒都一樣有！

想買野嘅亦可以係市集嘅小攤檔、禮品店或者商鋪度買，好多野都好有特色添架。
除咗買物之外，呢度仲有得畫人像添喎！

「360舞台」位於昂坪市集中間處，可以話係一個具有真實感嘅體驗。
因為360舞台融入咗特技、煙幕、爆破及電光對決等效果，
都十分令人為之震撼，就連小JM都睇到嘩嘩聲添！


「360動感影院」嘅門票可以到昂坪市集禮品店內去預選場次。
動感影院播放5D電影，令觀眾可以享受到視覺、聽覺、嗅覺、觸覺及動感嘅影院。
兩套電影為：小飛蟻大冒險及動感大嶼遊

食完又買完野就緊係要去啲景點影下相留念啦。
小JM婆婆其實好懷念以前一家人來遊覽大佛嘅時光，剛好今次約到可以兩家人一齊來玩，
氹到婆婆都好開心呢！

今次我地帶著小B們所以無上到去大佛，等小B們再大啲就同婆婆一齊行上去！

部份精彩景點：
菩提許願亭

天壇大佛、十二神將石像、
*係途經天壇大佛時會遇上不少黃牛喔! *
溫馨提示:
請勿餵飼牛隻喔!

寶蓮禪寺

昂坪360嘅資訊中心仲提供咗好多貼心嘅服務以方便遊纜嘅旅客，
就好似：纜車預約服務、行李寄存、失物認領、電話叉電等，
而且仲有服務大使幫手解答問題添架。


昂坪360
地址：香港大嶼山東涌達東路11號
電話： (852) 3666 0606
電郵地址： info@np360.com.hk
Facebook Page: https://www.facebook.com/np360/













張貼者： 於 沒有留言:

星期一, 3月 05, 2018

小JM愛玩樂。玩轉銅鑼灣。Planet J Kids

生日月雖然過咗，但小JM嘅玩樂心仍然不變！
一於喺小JM返學之前玩盡啲。
今日我地就同幾位朋友仔一齊去咗 Planet J Kids度大玩特玩！
Planet J Kids位於銅鑼灣皇室堡13/F，佔地面積約四千呎，係一個適合學前小B嘅室內遊樂場。
場區內設有六個不同遊戲區，分別為：休悠小島、想像工作室、創意積木城、奇幻互動地帶、勇者之丘及太空彈步，每一個遊戲區都係經過精心設計，有助啟發小朋友們嘅心智及身體發展所需，更可以令小朋友們放電嘅同時亦能增加親子互動添。
唔單止咁，場區更設有育嬰室、母乳餵哺房及BB車停放空間，可以稱得上係親子及母乳友善嘅場所。同時場區亦備有儲物櫃、消毒洗手液及Party房，方便之餘亦夠晒衛生。

溫馨提示：
1.)　基於個人衛生問題，記得要著襪喔。
2.)　有唔舒服就唔好去玩，要多啲休息。

3.)　為咗保持整潔，場內係唔可以飲食架。


簡介完Planet J Kids就緊係要分享一下各個遊戲區嘅特色啦!
每個遊戲區都蘊藏住對小朋友成長好重要嘅元素添架，
想知係咩？一齊來了解一下啦！


休悠小島
休悠小島設有沙發，可以俾小朋友睇下繪本或親子共讀;
如果小朋友仲有電，亦可以玩區內嘅迷你BB波池或軟墊攀爬組合，實行放晒啲電為止。
*「被放電」嘅爸媽們都一樣可以喺呢度休息架！*

【成長元素：休息是為了「玩」更長的路】


想像工作室
啱晒創意無窮無盡嘅小朋友們，區內備有多款不同玩具及工具。
即使小朋友想做醫生又或者店員都一樣無問題。
【成長元素：刺激想像力、鍛練社交能力 】


太空彈步
一個軟綿綿嘅滾筒及跑道，好玩刺激之餘亦可以訓練小朋友嘅平衡感及膽量。
如果爸媽們怕小B未啱玩，唔緊要，隔離仲有一個半透明嘅充氣彈彈床，實行滿足到每位小朋友嘅需要！
【成長元素：全身性運動；加強下半身肌力；加強前庭平衡感】


創意積木城
城堡內唔單止有兩條滑梯，仲有好多軟綿綿又安全嘅大型軟膠積木，
可以俾小朋友起野，實行自己屋企自己起！
【成長元素：發揮想像力 + 創造力】


奇幻互動地帶
喺積木城嘅滑梯旁就會見到有一個大型投影幕俾小朋友大施展一下身手及眼力，

實行同朋友仔一齊合作關過關。
【成長元素：官感刺激；鍛練反應】


勇者之丘
呢個區內設置咗一幅色彩繽紛嘅小小攀石場，可以俾小朋友鍛鍊一下身手。

【成長元素：鍛練大小肌肉；平衡左右腦發展；加強手腳協調  】


工作坊
如果小朋友玩到攰想抖下或者玩啲靜態活動一樣得，
呢度仲有工作坊可以俾小朋友參加添！
今年適逢狗年，仲有狗仔手作袋工作坊添，每款HKD$30
撞啱導師在場仲可以即時報名即時上堂整添架!



溫馨小提示：
勇者之丘、創意積木城及奇幻互動地帶 均設在波波海上喔!
玩太空彈步時記得要聽從工作人員指示呀!


Planet J Kids
地址：銅鑼灣皇室堡13樓1301-1305號
電話：2441 2778
營業時間：11AM – 9PM (Mon – Sun)
網址：http://www.jumpingym.com/planetjkids
Facebook專頁：https://www.facebook.com/PlanetJKids/









張貼者： 於 沒有留言:
訂閱： 文章 (Atom)