「夏天，為大地帶來美腿。。。」
咦，原來話咁快又踏入咗夏季。雖則媽媽我好鍾意夏天，之但係我其實好討厭被蚊咬，可能因為我本身係過敏體質嘅關係啦。
細細個俾蚊咬到要睇醫生、打針、食藥，真係幾誇張架。就早個零星期，媽媽又一次俾蚊咬到隻腳紅腫，要去睇醫生、食藥先好返，所以我對夏天真係又愛又恨！
因為屋企比較近山邊，夏天嘅季節就會比較多蚊蟲，所以就算係屋企我同小JM都要「高度戒備」，始終蚊蟲都有可能係病毒嘅傳播媒介之一嘛。而出街就更加要加強裝備，蚊夾、蚊貼就真係必須要，因為一個唔留神媽媽同小JM就會變成蚊蟲嘅美點。
可能係別人眼中係好大陣仗，但係當小B們俾蚊蟲咬到又紅又腫嗰陣，媽媽真係會心都痛埋架。
所以，無論係屋企定係外出，我地都一定會預備防蚊「法寶」。
室內防蚊篇
係屋企，我地會用「滅蚊機」。其實市面上都有好多不同牌子、種類嘅室內滅蚊用具，但因為小JM，所以我地就必須要考慮得更加仔細，務求減低對小B們產生嘅過敏機會。
老一輩會建議使用蚊香，但對於有小B嘅屋企而言，我就唔太建議。因為蚊香燃點後會釋放出煙霧，雖然不算太濃，但對於氣管敏感人仕或會引起不適，而且有啲蚊香成份會係燃點時產生樟腦既氣味，亦有機會使人感到頭暈架。再者，舊式蚊香需要燃點，會較為危險。
而市面亦有滅蚊燈 / 捕蚊燈嘅產品，當時媽媽亦有留意過，但因為朋友家中已經有用過，而且效果不太理想，所以建議我不要使用。而且使用後就要定期清理置於燈內嘅「蚊屍」，呢樣先係最嚇怕媽媽，所以媽媽堅拒說「不」就係啦！
所以為安全起見，媽媽我就揀咗係屋企用智能液體電驅蚊器。機仔細細嘅智能液體電驅蚊器，只要插上電源就可以驅蚊。如果怕小B會觸及，建議放係高少少嘅地方或者小B唔會掂到嘅地方較佳。
而我地用緊嘅係雷達驅蚊器，設有三段式時間功能：8 / 12 / 24小時，同時亦有除蚊模式可以選擇，係蚊多嘅時候不妨開強少少，平時就稍稍回復一般模式就可以啦！簡易方便設計，易於使用及控制時間，而且又慳位，所以絕對係我地嘅首選。
戶外防蚊篇
係外出，我地較常會用到蚊夾、蚊貼同蚊膏。
其實要搵一啲合適嘅防蚊產品亦都唔易，媽媽們要小心揀選先好呀，因為一個唔留神揀咗含有樟腦或者酒精成份嘅防蚊用品就會造成過敏架啦。
防蚊用品/藥膏嘅過敏成份你要知！
1. 樟腦
大多數蚊膏都有可能會有樟腦嘅成份，而樟腦係唔岩G6PD缺乏症（蠶豆症）嘅患者用架，因為會令患者出現溶血反應架。所以G6PD缺乏症嘅患者要小心使用呀。
2. 避蚊胺（DEET）
避蚊胺嘅驅蚊原理其實係擾亂蚊蟲對我地人體嘅感覺而已。但如果避蚊胺嘅濃度過高，就會令使用者出現不適嘅現象，如：眼睛腫痛、頭痛、氣管收窄等嘅徵狀。
所以醫生建議使用前先要了解產品嘅成份及濃度。一般情況下，成人應該使用避蚊胺濃度35%以下嘅產品；而十四個月以下嘅嬰幼兒則盡量使用避蚊胺濃度10%以下嘅產品較佳，而且一日只可以用一次喔。 同時，醫生亦不建議六個月或以下嘅小B們使用含避蚊胺成份嘅產品，以免造成不適。
3. 酒精
有啲防蚊液會以酒精去提取乾艾草、香茅、薄荷當中嘅揮發油，從而製成防蚊液。如果本身對酒精過敏嘅就不宜使用架啦！就算我地大人使用都要好好留意當中嘅濃度，因為濃度太高嘅話有機會刺激到皮膚架，所以比較建議都係噴係衣服表面而唔好直接噴係皮膚上。
係小JM未出世之前，媽媽我通常會用蚊怕水同蚊貼多，而大部份時間都會選用珮氏嘅防蚊產品，當然其他的品牌亦都用過不少，當中OFF又點少得呢。（你見上圖都有好幾款就知啦！）
蚊水，以前爸爸成日都會幫我買定，就連去CAMP都會俾定兩枝我防身。無他嘅，因為我真係惹蚊到可以變成「蜜蜂窩」咁架。以前細個就會覺得好方便，因為一噴就行得。雖然看似方便，但係同蚊膏一樣，噴完都會有少少「痴立立」嘅感覺，呢一點我係好唔鍾意，所以大個咗反而用多左蚊貼。
(圖片轉載自互聯網)
我一向用開珮氏嘅野紅茄系列，因為呢個系列係不含DEET成份架。呢個系列含有10%歐洲野生紅茄提取天然成份 IBI-246，可以干擾蚊蟲辨認人體散發出冒二氧化碳，從而使蚊蟲遠離人體，達驅蚊效果嘅。不過使用前都要輕輕刮一刮張蚊貼，令蚊貼既氣味釋放出來。使用都算方便，一刮一貼就可以。
但當然都會有唔好嘅時候啦，就係有時去完街唔記得撕返出來，有時仲可能洗完衫先發覺，攪到撕返出來之後件衫或褲會有膠水印添（真係大頭蝦！）。而且蚊貼氣味比較濃，未必個個人都會接受到。
而家其實要小JM乖乖地、定定地咁俾我地幫佢貼蚊貼或者夾蚊夾都好難，因為就算肯乖乖地貼完都好，轉個頭就會不停揾張蚊貼，同偷偷地撕張蚊貼出來玩，又或者成日手多多去抓個蚊夾。真係激C媽媽啦。
最近我就用咗兩款「防蚊好物」去幫我解決蚊貼所帶出嘅煩惱！
就係Floroma 花の滴香水醒神筆同埋Familoves防蚊處理套裝！
花の滴係一枝集香水、防蚊、止痕、提神嘅好幫手，好啱媽媽們使用，我上年一試就已經愛上咗。而且細細枝方便使用，再加上走珠式塗抹好簡單又夠快手。
Familoves防蚊處理套裝就可以話係夏天家居防蚊嘅好幫手。
兩款防蚊好物分別係衣物防蚊噴霧及衣物防蚊浸洗液，
唔單止大人或小朋友衣物可以用，就連屋企嘅窗簾用具都一樣用得。
衣物防蚊噴霧其實好啱平時用，因為夠方便同快捷，而且使用方法簡單，就連長輩都一樣識用。
只要使用前先將衣物防蚊噴霧搖勻，再係距離衣物約10-20厘米處均勻咁噴係表面就得架啦！乾咗就可以穿著或者收好。
而每200毫升大約可以處理6-10件成人衣物。
衣物防蚊浸洗液就要小心使用，最好使用個陣戴埋手套，咁就萬無一失。
將乾淨嘅衣服連同一枝300ml嘅衣物防蚊浸洗液及清水一同放入盤中，攪勻並泡浸至少20分鐘，之後無須過水就可以直接晒乾就可以穿著或者收好架啦。
雖然起初用會覺得有啲花時間，但只要噴一次就有長達7 -10 天嘅防蚊效果，如果浸泡嘅話仲可以有效防蚊3個月或者20次洗水內有效添！真係啱晒我！
小JM媽媽係使用之前亦都仔細咁睇過成份，係不含樟腦及避蚊胺（DEET），所以過敏嘅機會亦相對減低。而Familoves防蚊處理套裝就連蠶豆症(G6PD)患者都一樣可以使用添。
防蚊用品使用小提示：
1.) 留意有效期及存放方法
建議靚媽們要留意防蚊用品嘅有效期及存放方法，因為存放太耐或不當都會令產品失效架。
2.) 小心留意成份
建議為小B揀選零香料、零防腐劑嘅用品，以降低敏感嘅機會
3.) 小心塗抹
為小B搽抹蚊水個陣，建議先將蚊水噴係自己手上再幫小B搽；而蚊貼就緊係貼係衣襪之上，而唔好直接貼於皮膚啦！
所以話，做媽媽嘅真係一分鐘都唔可以掉以輕心，每一樣俾小B用嘅、食嘅，都會由自己先試用過先再俾小B用。呢啲真係要做咗媽媽先會明白同體會到，以前做女個陣又點會咁做先得架。哈哈（最多用完唔啱就放係度）。
Btw，希望今個夏天唔駛再俾蚊咬到手手腳腳都係印啦。要幫小JM Keep 住個靚靚樣先得！
